DİM-in bölmə rəhbərinin səhvinə görə abituriyent imtahandan KƏNARDA QALIB
Xaçmazda QALMAQAL – DİM-in bölmə rəhbərinin səhvinə görə abituriyent imtahandan KƏNARDA QALIB.
AzTehsil.com xəbər verir ki, Dövlət İmtahan Mərkəzinin (DİM) təşkil etdiyi ikinci şans imtahanında iştirak etmək istəyən abituriyent ciddi problemlə qarşılaşıb. Söhbət Xaçmaz rayonunun Hacıqazma kənd sakini Aytən Ələddin qızı Talıbovadan gedir.
Valideynin iddiasına görə, bütün prosedurlar düzgün yerinə yetirilsə də, DİM-in səhlənkarlığı nəticəsində abituriyent buraxılış vərəqəsi ala bilməyib və imtahanda iştirak hüququndan məhrum edilib.
Məsələ ilə bağlı bizim.media.аz-a abituriyentin atası Ələddin Talıbov müraciət edərək yaşadıqları çətinliyi bölüşüb. Onun sözlərinə görə, qızının ikinci qəbul imtahanına qeydiyyatı üçün DİM-in Xaçmaz Regional bölməsinə müraciət edib və bu proses üçün kömək istəyib. Regional bölmənin müdiri Faiq Nadirsoy vətəndaşın özünə yaxınlaşaraq “gəlin, sizi mən yola salım” deyib:
“Faiq müəllim mənə kod verdi və “poçt şöbəsinə ödəniş edib, sonra yaxınlaşın” dedi. Mən də ödənişi edib qəbzi ona təqdim etdim. Dedi ki, qəbzə ehtiyac yoxdur, sistemdə görünür. Bir vərəqə çıxarıb verdi və qeydiyyatın aparıldığını bildirdi. Biz də evə qayıtdıq və gözlədik. Ötən gün qızım şəxsi kabinetinə daxil olanda orada heç bir məlumat yox idi”.
Valideyn vəziyyəti aydınlaşdırmaq üçün yenidən DİM-in Xaçmaz bölməsinə üz tutub. Lakin bu dəfə ona verilən cavab, sözün əsl mənasında, şok effekti yaradıb. Qızının sitemdə adının olmadığını deyən DİM rəsmisi ona köhnə vərəqə verdiyini də etiraf edib:
“Deyirəm ona ki, bu vərəqi siz vermisiz mənə... Deyir, ola bilsin ki, səhv vermişəm. Anlamıram, bir nəfərin səhvi ucbatından qızımın taleyi heçə sayılmalıdır? Üstəlik deyir ki, bizim borcumuz deyil, özünüz qeydiyyatdan keçirməliydiz. Mənim övladım bir aydı əlavə hazırlıqlara gedirdi.
Birinci imtahanda 307 bal toplayıb, ikinci şansında da yararlanmaq istəyirdi. Ayın 6-sı imtahandı və qızım o sınaqda iştirak hüququndan məhrum olub. Axı mən bu işi onun göstərişi ilə etdim. İndi buna kim cavabdehdir?- deyə Ələddin Talıbov gileylənib.
Ələddin Talıbov qeyd edir ki, qızı ilk qəbul imtahanında 307 bal toplayıb və ikinci şans imtahanında daha yüksək nəticə əldə etmək üçün bir aydır əlavə hazırlıqlara qatılıb. Lakin qeydiyyat sisteminə düşmədiyi üçün 6 iyulda keçiriləcək imtahanda iştirak hüququnu itirib:
Məsələ ilə bağlı Dövlət İmtahan Mərkəzindən bizim.media.аz-a bildirilib ki, vətəndaşın müraciəti araşdırılması üçün müvafiq şöbəyə yönləndirilib.
