Şahmat üzrə Respublika çempionları - ƏTRAFLI
AzTehsil.com xəbər verir ki, idarə müdiri “Zəkaların mübarizəsi” olimpiadasının şahmat üzrə Respublika çempionları ilə görüşüb.
Abşeron-Xızı Regional Təhsil İdarəsinin müdiri İlhamə Abdullayeva “Zəkaların mübarizəsi” olimpiadasının şahmat üzrə Respublika çempionu olmuş Sumqayıt komandasının üzvləri ilə görüş keçirib.
Görüş zamanı İdarə müdiri şagirdləri qazandıqları yüksək nailiyyət münasibətilə təbrik edib, onların bu uğurunun regionun təhsilində əldə olunan müsbət nəticələrin göstəricisi olduğunu vurğulayıb. O, eyni zamanda müəllimlərin və valideynlərin bu uğurda mühüm rolunu qeyd edib və komandaya gələcək fəaliyyətlərində uğurlar arzulayıb.
Qeyd edək ki, “Zəkaların mübarizəsi” olimpiadası Heydər Əliyev Fondu və Elm və Təhsil Nazirliyinin birgə əməkdaşlığı ilə təşkil olunub. Olimpiadanın əsas məqsədi şagirdlərdə fənlərin dərindən öyrənilməsinə marağın artırılması, onların dünyagörüşünün genişləndirilməsi, sağlam rəqabət mühitinin yaradılması, şagirdlər arasında dostluq əlaqələrinin möhkəmləndirilməsi və ümumilikdə öyrənməyə təşviqin gücləndirilməsidir.
İki mərhələdə keçirilən olimpiada bilik və şahmat yarışlarından ibarət olub. Sumqayıt komandası respublika mərhələsində şahmat üzrə çempion olaraq böyük uğura imza atıb.
