Sertifikasiya ilə bağlı..- Ekspert

“Müəllimlərə çətin suallar yox, dəstək lazımdır!” - Sertifikasiya ilə bağlı REAKSİYA

Ötən gün MÜTDA-nın direktor müavini Vəfa Yaqublu sertifikasiya ilə bağlı maraqlı məqama toxunub.

O, qeyd edib ki, sertifikatlaşdırmanın sualları daha mürəkkəb, məktəb proqramından yüksək olmalıdır.

AzTehsil.com xəbər verir ki, məsələ ilə bağlı AzEdu.az-a açıqlama verən Sosial Tədqiqatlar Mərkəzinin (STM) sektor müdiri, elm və təhsil məsələləri üzrə tədqiqatçı Elmin Nuri sertifikatlaşdırmanın test imtahan mərhələsində sualların çətinlik dərəcəsinin artırılmasına razı olmadığını qeyd edib:“MÜTDA-nın direktor müavini Vəfa xanım Yaqublunun sertifikasiyada iştirak edən müəllimlərlə bağlı, həmçinin sertifikatlaşdırmanın test imtahan mərhələsində sualların çətinlik dərəcəsinin ağırlaşdırılmasıyla bağlı söylədiklərinə qatılmıram. Bu o demək deyil ki, bizim müəllimlərə inamımız yüksək deyil, lakin suallar çətinləşdiyi halda vəziyyət çox kritik olacaq. Bu o demək deyil ki, suallar çətinləşdiyi halda müəyyən bir neqativlər müşahidə edəcəyik. Sadalananlar təkrarlana bilər, bu öz yerində.

Lakin mənim razı olmamağımın səbəbi, detalı bu deyil. Bir çox dövlətdə müəllimlərin sertifikatlaşdırılma prosesinin məqsədi təhsilverənin öz tədris etdiyi fənnlə bağlı müəyyən biliklərə nə dərəcədə malik olub-olmamasını müəyyənləşdirməkdir.

Sertifikatlaşdırma prosesi bir neçə mərhələdən ibarətdir. İstər test, istərsə də müsahibə mərhələsi olsun, hər birində müəllimin öz tədris etdiyi predmetə nə dərəcədə bələd olması öyrənilir. Bu bələd olma prinsipinə görə də müəllimlərə təqdim olunan sualların çətinlik dərəcəsini artırmağa çalışmamalıyıq”.

Ekspertin sözlərinə görə, sualların çətinləşdirilməsinə ehtiyac yoxdur:

“Rəsmi şəxslərin fikrinə hörmətlə yanaşıram. Şəxsən mənim subyektiv yanaşmama görə müəllimlərin sertifikasiya prosesində təqdim edilən sualların çətinləşdirilməsinə qətiyyən ehtiyac yoxdur. Bəli, mən də razıyam ki, suallar bir o qədər də çətin salınmır. Amma onların daha çətin səviyyədə olmasını qəbul etmirəm. Buna ümumiyyətlə yol vermək olmaz.

Birincisi, sertifikasiyanın özü uzun illər imtahan və test vərdişlərindən uzaq olan müəllimlər üçün əlavə stress və gərginlikdir. Məhz buna görə də onların bir çoxu sertifikasiyadan uğurlu nəticə qazana bilmədilər. Doğrudur, yalnız intellektual bilikləri, peşə ilə bağlı bilikləri o qədər də yüksək olmadığı üçün kəsilənlər də oldu. Lakin növbəti mərhələlərdə sualların çətinlik dərəcəsi qalxsa, arzuolunmaz hal yaşana bilər. Biz müəllimlərə güvənirik. Bu gün sertifikasiya üçün təqdim edilən suallar əsasən asandır və düşünürəm ki, bu cür də qalmasına ehtiyac var”.