Qubada Konfrans
Qubada 28 May - Müstəqillik Günü münasibətilə “Azərbaycan XX əsrin əvvəllərində: müstəqilliyə aparan yollar” mövzusunda konfrans keçirilib.
AzTehsil.com xəbər verir ki, 27 may 2025-ci il tarixdə Quba rayon Heydər Əliyev Mərkəzində Yeni Azərbaycan Partiyası Mərkəzi Aparatının, Quba Rayon İcra Hakimiyyətinin və Yeni Azərbaycan Partiyası Quba rayon təşkilatının birgə təşkilatçılığı ilə 28 May - Müstəqillik Günü münasibətilə “Azərbaycan XX əsrin əvvəllərində: müstəqilliyə aparan yollar” mövzusunda konfrans keçirilmişdir. Tədbirdə Quba Rayon İcra Hakimiyyətinin başçısı İlqar Mahmudov, YAP Veteranlar Şurasının sədri Arif Rəhimzadə, YAP Veteranlar Şurasının üzvü Dilarə Seyidzadə, YAP Quba rayon təşkilatının sədri Fidan Hüseynova, Rayon İcra Hakimiyyətinin və YAP Quba rayon təşkilatının məsul şəxsləri, Rayon Ağsaqqallar Şurasının üzvləri, gənc müəllimlər, mədəniyyət işçiləri, fəal gənclər və tələbələr iştirak etmişdir.
Çıxışlarda qeyd edilmişdir ki, 28 may 1918-ci il tarixdə Azərbaycan xalqı özünün və Şərqin ilk demokratik, hüquqi, dünyəvi və parlamentli respublikasını yaratmış, istiqlaliyyətimizi elan edərək, xalqımızın müstəqillik əzmini nümayiş etdirmiş, həmin gün Azərbaycan Xalq Cümhuriyyətinin Milli Şurası İstiqlal Bəyannaməsini imzalamaqla Azərbaycanın müstəqilliyini dünyaya bəyan etmiş, xalqımızın çoxəsrlik dövlətçilik ənənələrini davam etdirmişdir. XX əsrin sonlarında müstəqilliyinə yenidən qovuşan Azərbaycan suverenliyini qoruyub saxlamağı bacarmış, çətin siyasi-iqtisadi dövrdə hakimiyyətə qayıdan Ulu Öndər Heydər Əliyev Azərbaycan dövlətçiliyinin qorunması üçün qətiyyətli tədbirlər görmüş, ölkədə davamlı ictimai-siyasi sabitliyi bərqərar etmişdir. Siyasi və iqtisadi baxımdan sabit, davamlı və dayanıqlı inkişaf edən Azərbaycanın bugünki nailiyyətləri Ulu Öndər Heydər Əliyev siyasətinin və bu siyasətin möhtərəm Prezidentimiz cənab İlham Əliyev tərəfindən uğurla, qətiyyətlə davam etdirilməsinin məntiqi nəticəsidir. Müstəqil Azərbaycanın nailiyyətləri bu gün respublikamızın dinamik sosial-iqtisadi inkişafı, gündən-günə abadlaşan şəhər və rayonlarımızın yeniləşən siması ilə müşahidə olunmaqdadır. Bu uğurların ən möhtəşəmi isə Müzəffər Ali Baş Komandan cənab İlham Əliyevin rəhbərliyi altında mərd oğullarımızın canı və qanı bahasına Azərbaycan xalqının milli mənliyini, gücünü özünə qaytarması və ən böyük xilaskarlıq missiyasını yerinə yetirməklə xalqımızın qəhrəmanlıq salnaməsini qızıl hərflərlə yazması olmuşdur. Ötən illər ərzində atılmış hər bir addım və qəbul olunmuş hər bir qərar doğma Azərbaycan torpaqlarının işğaldan azad olunmasına xidmət etmiş, bütün istiqamətlərdə qazanılan uğurların, əldə edilən nailiyyətlərin bir hədəfi olmuşdur - işğal altında olan torpaqlarımızın düşməndən azad edilməsi və Azərbaycanın bütün sərhədləri boyunca Dövlət bayrağımızın dalğalanması.
Konfransdan əvvəl Ulu Öndər Heydər Əliyevin Quba şəhərindəki adını daşıyan mədəniyyət və istirahət parkındakı abidəsi ziyarət olunmuşdur.
