Azərbaycanlı alim Macarıstanda qalib olub
Cavad nəslindən olan azərbaycanlı gənc alim Macarıstanda qalib oldu: "Böyük rəqabət var idi".Azərbaycanlı alim Nərgiz Hacıyeva Macarıstanın Milli İdarəetmə Universitetinin nüfuzlu Ludovika Alimlər Proqramının qalibi olub.Azərbaycanlı alim Nərgiz Hacıyeva Macarıstanın Milli İdarəetmə Universitetinin nüfuzlu Ludovika Alimlər Proqramının qalibi olub.
Ludovika Alimlər Proqramı (Ludovika Scholars Program) — Macarıstanın Budapeşt şəhərində yerləşən Milli İdarəetmə Universiteti tərəfindən həyata keçirilən beynəlxalq və nüfuzlu elmi proqramdır. Bu proqramın məqsədi dünyada müxtəlif sahələr üzrə elmi araşdırmalar aparan, liderlik keyfiyyətləri və yüksək akademik göstəricilərə sahib alimləri bir araya gətirmək, onların təcrübəsini bölüşmək və tədqiqat mühitini gücləndirməkdir.
AzTehsil.com xəbər verir ki, proqramın azərbaycanlı qalibi, Azərbaycan Dövlət İqtisad Universitetinin Elmi fəaliyyətin təşkili şöbəsinin müdiri, Xanım Tədqiqatçılar Şurasının rəhbəri Nərgiz Hacıyeva Teleqraf-a danışarkən prosesin olduqca rəqabətli şəkildə keçdiyini bildirib:
“Ludovika Alimlər Proqramı Macarıstan Milli İdarəetmə Universiteti tərəfindən həyata keçirilən nüfuzlu elmi layihədir. Universitet 1990-cı ildə təsis olunub və bu illər ərzində bir çox dövlət xadimi, diplomat və akademik məzun yetişdirib. 2009-cu ildən etibarən hər il Ludovika Alimlər Proqramı elan olunur. Bu günə qədər proqramda heç bir azərbaycanlı qadın alim iştirak etməyib. İndiyədək yalnız iki kişi iştirakçı Azərbaycandan seçilib”.
Xanım tədqiqatçı qeyd edib ki, iştirak üçün namizədlərdən elmi nəşrlərin siyahısı, liderlik bacarıqları, əldə etdikləri qrantlar və qonaq məruzəçi kimi iştirak etdikləri xarici universitetlərin siyahısı tələb olunur:“Proqram iştirakçılarından yüksək elmi fəaliyyətlər tələb olunur. Təqdim etdiyim layihədə su diplomatiyası və siyasi elmlərin qarşılıqlı əlaqəsini təhlil edilib. Layihə işğaldan azad olunmuş ərazilərdə su resurslarının idarə olunmasında qadın alim və xanımların rolu əks olunub. Münsiflər heyəti tərəfindən bəyənilib.
Bu ilin oktyabr ayında iki həftəlik qonaq professor kimi Budapeştə dəvət olundum. Həmin müddətdə konfliktologiya sahəsində həftədə 4 saat mühazirələrdə iştirak edəcəm. Proqram çərçivəsində iştirakçılara yüksək məbləğdə qrant verilir və rəsmi təltif mərasimi keçirilir. Bu nüfuzlu proqram hər il yüksək şəraitdə keçirilir. Qaliblərin seçimi Macarıstanın tanınmış iqtisadi və siyasi alimlərindən ibarət münsiflər heyəti tərəfindən həyata keçirilir. Dünya üzrə 250-300-dən çox tədqiqatçının müraciət etdiyi proqramda yalnız akademik göstəriciləri və elmi potensialı yüksək olan namizədlər seçilir. Bu da o deməkdir ki, hər ölkədən iştirakçı seçilmir və iştirak hüququ qazanmaq kifayət qədər çətindir".
Xatırladaq ki, 1993-cü il təvəllüdlü Nərgiz Hacıyevanın ata tərəfi Cavad xan nəslindəndir.
O, 2014-cu ildə Bakı Dövlət Universitetinin “Beynəlxalq Münasibətlər” ixtisasını bakalavriat səviyyəsini, 2017-ci ildə isə Litva və Fransa dövlətlərinin ayırdığı təqaüd hesabına Vitautas Magnus Universitetinin və Sciences PO-nun “Beynəlxalq münasibətlər və diplomatiya” ixtisasının magistratura səviyyəsini fərqlənmə diplomları ilə bitirib.
Avropa Diplomatik Akademiyasının (European Academy of Diplomacy) “Avropa İttifaqının xarici siyasəti” adlı proqramının qrantla fəxri məzunudur.O həmçinin ABŞ-nin Miçiqan Universitetinin nüfuzlu və yüksək UM "Weiser” fəxri post-doktoral təqaüdünə layiq görülən ilk və yeganə azərbaycanlı xanım siyasi alimdir.
