Universitetə qəbul olmaq hələ şagirdin biliyini tam ortaya çıxarmır....
İmtahan nəticələrinin açıqlanması bəzi ailələr üçün sevinc, digərlərində isə təəssüf hissi yaradıb. Yüksək bal toplayan şagirdlərin təriflə qarşılanması doğru hal olsa da, bəzən zəif nəticə göstərənlərə haqsızlıq kimi görülür. Bu cür ikili yanaşmalar isə ailədə, məktəbdə şagirdlərin psixoloji durumuna və dərsə olan münasibətinə birbaşa təsir edir. Bəzi valideynlərin imtahan nəticələrinə əsaslanan davranışı, uşaqlarda motivasiya itkisi, aqressivlik və təhsildən uzaqlaşma ilə nəticələnə bilər.
AzTehsil.com xəbər verir ki, bu haqda açıqlamasında təhsil məsələləri üzrə ekspert Rizvan Fikrətoğlu bildirib ki, burada əsas məsuliyyət valideynlərin üzərinə düşür:
"Hər bir şəxsin ali təhsil almaq öhdəliyi yoxdur. Universitetə qəbul olmaq hələ şagirdin bilik, savad və digər qabiliyyətlərini tam ortaya çıxarmır. İxtisas və qrupu seçərkən şagirdə qarışmaq, onu məcbur etmək yanlışdır. Bilik göstəriciləri zəif olan, marağı və potensialı fərqli inkişaf edən uşaqlara məcbur universitet sevdirmək mümkün deyil".
O bildirib ki, yüksək bal toplamaq şagirdin əziyyətinin bəhrəsidir:
"Amma zəif nəticə toplamış şagird təhsildən, cəmiyyət təcrid olunacaq münasibət görməməlidir. İkinci dəfə hazırlaşıb daha yüksək nəticə toplamaq və ya düzgün sənət seçərək, təkmilləşmək daha perspektivlidir. Valideynlər, övladları arasında təhsildə göstərdikləri nəticəyə görə fərq qoymamalıdır. Bu uşaqlarda özgüvənsizlik, dərslərə marağın azalması, ailəyə inamsızlıq, məktəbdən uzaqlaşmaq kimi hallara səbəb ola bilər".
Rizvan Fikrətoğlu qeyd edib ki, uğuru və onu qazananı hər kəs sevir: "Əsas olan uğursuzluq yaşamış birinə inanmaq və onu qəbul edib həvəsləndirməkdir. Valideyn bilməlidir ki, övladının potensialından artıq bir şeyi ondan tələb edə bilməz. Məhz, ətrafa, qohumlara göstəriş üçün edilən performans onların uşaqlarına zərər vurur.
İndiki dövrdə, uşaqlar daha həssas düşünür və davranırlar. Xüsusilə də, analar bilməlidir ki, onların təcrübələri övladlarından nisbətən çoxdur. Övladları üçün təhsilə xərclənən pulları onların başına vurmaq yerinə, qonşu-qohum uşaqları ilə müqayisə etmək əvəzinə onların həvəsini artırmaq və dəstək olmaq önəmlidir".
