Universitetlərin rəqəmsallaşmasının kadr təminatı.

Bildiyiniz kimi, universitetlərimizdə son illər yeni prorektor ştatları təsis edilir. Strateji idarəetmə üzrə prorektor ştatı son ildə bir neçə universitetlərdə təsis edildi. İndi isə təhsilin rəqəmsallaşdırılması üzrə ştat təsis edildi. Düzü çox gecikmiş qərarlar olsa da, bu istiqamətdə universitetlərin fəaliyyəti onun uğurunu müəyyən edəcəkdir.

Bu ərəfədə UNEC-də rəqəmsallaşma üzrə prorektor ştatı təsis edilib və təyinat olub. Təbrik edirik. Uğurlu olsun. UNEC-də bu ştata çoxdan ehtiyac vardı.

Rəqəmsallaşma üzrə prorektorluq ştatı universitetlərimiz üçün yeni və çox mühüm istiqamətdir. Bu məsələnin aktuallığını biz son 15 ildə dəfələrlə öz məqalələrimizdə qaldırmışdıq. Nəhayət ki, TN bu məsələnin əhəmiyyətini gec də olsa qiymətləndirdi. Məsələnin maraqlı tərəfi odur ki, ölkə üzrə orta məktəblərdə informatlaşma üzrə 15 ildir ki, direktor müavini ştatı vardı, amma universitetlərdə bu ştat hələ indi yaradılır. Amma universitetlərdə buna ehtiyac daha çox idi.

Digər maraqlı məqam təhsilin informatlaşması ixtisası üzrə bu günə qədər ölkədə kadr hazırlığı aparılmayıb (nə bakalavr, nə də magistr pilləsində). Bu spesifik fəaliyyət sahəsi xüsusi hazırlıq və peşəkarlıq tələb edir, informatika ixtisaslı kadrlar bu işi çətin ki bacara. Bu işdə informatikadan çox, təhsil elmini bilmək lazımdır. Universitetin Strateji idarəedilməsi üzrə prorektor ştatlarında olduğu kimi, deyəsən informatlaşma üzrə də peşəkar kadrlar tapmaq və təyin etmək çətin olacaqdır. Əgər kimi gəlsə bu ştatlara təyin edəcəklərsə (bəzi universitetlərdə " strateji idarəetmə nədir? "sualına cavab verə bilməyən təcrübəsiz və bilgisizlər prorektor təyin edilib), onda bu nəticəsiz və faydasız iş imitasitası olacaqdır.

Dosent İlham Əhmədov