Azərbaycanlı tələbələr Türkiyənin peyk texnologiyaları ilə tanış olublar
Azərbaycan Kosmik Agentliyinin (Azərkosmos) nəzdində fəaliyyət göstərən Kosmik Akademiya tərəfindən həyata keçirilən təcrübə mübadiləsi proqramının iştirakçıları Ankarada peyk texnologiyalarının hazırlanması sahəsində Türkiyənin aparıcı özəl şirkətlərindən biri olan “Plan S”i ziyarət ediblər.
Azərbaycan Təhsil Nazirliyi, ölkəmizin Elm və Ali Təhsil üzrə Dövlət Agentliyi və SABAH qrupu ilə əməkdaşlıq çərçivəsində, Türkiyənin “Gökmen” aerokosmik və aviasiya mərkəzinin dəstəyi ilə həyata keçirilən proqramın 26 iştirakçısına türk şirkətinin layihələri və gələcək planları barədə ətraflı məlumat verilib.
“Plan S” nümayəndələri azərbaycanlı tələbələri maraqlandıran sualları cavablandırıblar.
AzTehsil.com xəbər verir ki, proqram iştirakçılarından biri, Azərbaycan Milli Aviasiya Akademiyasının tələbəsi İmran Quliyev AZƏRTAC-la söhbəti zamanı təcrübə mübadiləsi proqramının təşkilatçılarına təşəkkürünü bildirib.
"Türkiyənin aparıcı müdafiə və aerokosmik sənaye şirkətlərinin istehsal imkanları ilə tanış olmaq, qardaş ölkənin mütəxəssislərinin innovativ yanaşmalarını və mühəndislik həllərini öyrənmək, proqram iştirakçılarının bilik və təcrübə qazanması üçün böyük fürsətdir”, - deyə o qeyd edib.
İ.Quliyev beşgünlük təcrübə mübadiləsi proqramı sayəsində azərbaycanlı tələbələrin praktiki bacarıqlarını inkişaf etdirəcəyinə və əldə edilmiş biliklərini möhkəmləndirəcəyinə əmin olduğunu vurğulayıb.
"Bizə Türkiyənin iri aerokosmik və müdafiə sənayesi şirkətlərinin istehsalat laboratoriyalarında olmaq, aviasiya simulyatorlarını sınaqdan keçirmək imkanı yaradıldı. Bu, bizi çox təsirləndirdi”, - deyə o əlavə edib.
Azərbaycan Texniki Universitetinin tələbəsi Əlyoldaş Əmiraslanlı isə bildirib ki, bu cür proqramlar Azərbaycan üçün müasir kadr bazasının formalaşdırılmasına ciddi töhfə verir və gənc mütəxəssislərə aparıcı xarici şirkətlərin imkanlarını öyrənmək, bilik və bacarıqlarını artırmaq üçün böyük şans yaradır.
Proqram çərçivəsində azərbaycanlı tələbələr daha sonra Ankarada “Roketsan” müdafiə sənayesi şirkətini də ziyarət ediblər.
Azərbaycanlı tələbələrin texnoloji sahələrdə nəzəri və praktiki biliklərini artırmağı hədəfləyən səfər proqramı martın 19-dək davam edəcək və Bursa, Ankara və İstanbul şəhərlərində fəaliyyət göstərən müxtəlif şirkətləri əhatə edəcək.
