Elm və Təhsil Nazirliyinin yanında İctimai Şuranın üzvləri Peşə Təhsil Mərkəzinə səfər edib

Elm və Təhsil Nazirliyinin yanında İctimai Şuranın üzvləri İqtisadi Zonaların İnkişafı Agentliyinin nəzdində Peşə Təhsil Mərkəzinə səfər edib.

AzTehsil.com xəbər verir ki, İqtisadi Zonaların İnkişafı Agentliyinin nəzdində Peşə Təhsil Mərkəzində 05.03.2025-ci il tarixində Elm və Təhsil Nazirliyinin yanında İctimai Şuranın üzvləri ilə Peşə Tədris Mərkəzinin rəhbərliyi və Mərkəz yanında İctimai Şura üzvləri arasında görüş keçirilib. 

Görüşdə qonaqları Peşə Təhsil Mərkəzinin direktoru Kənan Bağırov salamlayıb və təhsil ocağına göstərilən marağa və əməkdaşlığa görə təşəkkürünü bildirib. O, qonaqlara Mərkəzdə həyata keçirilən fəaliyyət haqqında ətraflı məlumat verib və son ildə tələbələrinin qazandığı uğurları vurğulayıb. Görüş zamanı çıxış edən Peşə Təhsil Mərkəzi yanında İctimai Şuranın sədri Kəmalə Aşumova Mərkəzdə tələbələr üçün sosial-mədəni fəaliyyətin, eləcə də müxtəlif mövzulu görüşlərin, təlimlərin və seminarların təşkil olunduğunu qeyd edib. 

Görüşdə peşə təhsilinin inkişaf etdirilməsi, müasir əmək bazarının tələblərinə uyğun kadr hazırlığı, dövlət və özəl sektorun bu prosesdəki rolu və qarşılıqlı əməkdaşlıq imkanları müzakirə olunub, Mərkəzdə tətbiq edilən yeniliklərə, tələbələrin praktik biliklərinin artırılması və işəgötürənlərlə əlaqələrin gücləndirilməsi məsələlərinə toxunulub. 

Görüşdən sonra Elm və Təhsil Nazirliyinin yanında İctimai Şuranın üzvləri Peşə Təhsil Mərkəzinin tədris zonaları, sinif otaqları və laboratoriyaları ilə tanış olub, dərs prosesini izləyib. Yekunda Elm və Təhsil Nazirliyinin yanında İctimai Şuranın sədri Hikmət Əlizadə şura üzvləri adından çıxış edərək təşəkkür edib, Mərkəzdə görülən işlərin təqdirə layiq olduğunu vurğulayıb və gələcək fəaliyyətdə əməkdaşlara uğurlar arzu edib. 

Mənbəə : Elm və Təhsil Nazirliyinin yanında İctimai Şuranın FB səhifəsində paylaşım edilib.