Azərbaycanda şagirdlər yeni sualtı dron hazırlayıblar
Ötən həftə “Sabahın alimləri” müsabiqəsinin keçirilməsi və ən uğurlu layihələrin qaliblərinin mükafatlandırılması ilə yadda qaldı.
AzTehsil.com xəbər verir ki, müsabiqənin qızıl medalını qazanan Qubadlı rayon Cəlal Həşimov adına Mərdanlı tam orta məktəbin XI sinif şagirdi Həmid Məmmədli və Bakı şəhəri Səttar Bəhlulzadə adına Xarici dillər təmayüllü gimnaziyanın XI sinif şagirdi Toğrul Abbas “Sualtı dron” layihəsi üzərində işləyərək sualtı araşdırmalara yeni bir baxış gətirən texnologiya hazırlayıblar.
Layihə barədə “Azərbaycan müəllimi”nə danışan Həmid deyir ki, bu dron sualtı obyektləri tanıyır və 10 fərqli fiquru suyun altında tanıya və analiz edə, torpedo ata bilir. Müdafiə və təhlükəsizlik sahəsində istifadə oluna biləcək bu xüsusiyyət dronu daha funksional edir. Dron axtarış alqoritminə malikdir. Belə ki, obyektlərin müəyyən edilməsi və izlənməsi üçün xüsusi alqoritm tətbiq edilib.
Adıçəkilən layihənin 8 aya hazırlandığını söyləyən Toğrul dizayn, elektronika və proqramlaşdırma hissələrinin onların özlərinə aid olduğunu qeyd edir: “Layihəmiz “STEAM Azərbaycan”ın dəstəyi ilə ərsəyə gəlib. Elmi rəhbərimiz isə Azərbaycan Dövlət Neft və Sənaye Universitetində “Mexatronika və robotexnika mühəndisliyi” ixtisası üzrə təhsil alan 4-cü kurs tələbəsi Vüqar Sadıqlıdır. Onun elmi dəstəyi sayəsində sualtı dronun texniki və proqramlaşdırma hissələri daha peşəkar səviyyəyə çatdırmağa nail olmuşuq”.
Həmid və Toğrul qızıl medal qazanacaqlarına inandıqlarını və bu müsabiqənin onlara çox dəyərli təcrübələr qazandırdığını bildirirlər. Həmidin sözlərinə görə, müsabiqə onlara təkcə elmi uğur gətirmədi, həm də çox dəyərli dostlar qazandırdı: “Gələcəkdə daha böyük layihələrə imza atmaq üçün bu təcrübə bizə çox kömək edəcək”.
