Xəbərlər
26 may 2017
3 399
Respublika fənn olimpiadaları qaliblərinin mükafatlandırılması mərasimi keçirilib – FOTO
Bu il Naxçıvan Muxtar Respublikasından şagirdlər də daxil olmaqla IX-XI və xüsusi istedada malik aşağı sinif şagirdlərinin iştirak etdiyi olimpiadada 8 fənn üzrə 263 qalib müəyyən edilib. 48 nəfər şagird qızıl, 85 nəfər gümüş, 130 nəfər isə bürünc medala layiq görülüb.Respublika fənn olimpiadalarının birinci-rayon (şəhər) mərhələsində 30 000 nəfərə yaxın şagird iştirak edib.
Aztehsil.com xəbər verir ki, 1news.az-a Təhsil Nazirliyinin mətbuat xidmətindən verilən məlumata əsasən, olimpiada ilə bağlı millət vəkilləri, ziyalıların təəssüratlarını təqdim edirik.
Şahlar Əsgərov professor
"Azərbaycanda olimpiada hərəkatı son iki-üç ərzində çox inkişaf edib. Əvvəla, 30 mindən çox şagirdin iştirak etməsi sevindiricidir. Kəmiyyət göstəriciləri həm də keyfiyyət göstəricilərinə təsir göstərir. 260-dan çox şagird medallarla təltif edildi. Yaxşıların yaxşıları olan bu şagirdlər üçün yadda qalan hadisəyə çevrildi.
Onlar özlərini daha səfərbər edər, daha yüksək zirvələri fəth edir. Mən onların gözlərində sevinc görürdüm. İnsanlara mənəvi dəyər veriləndə xoşbəxtlik daha da yüksək olur. Nobel mükafatçısı Əziz Sancarın olimpiada iştirakçılarına müraciəti də təsirli idi. İnanıram ki, o məktub da gənclərin həyatında silinməz iz buraxacaq”.
Tahir Mirkişili Millət vəkili
"Düşünürəm ki, fənn olimpiadalarının keçirilməsi orta məktəb uşaqların daha yaradıcı olmalarına və eyni zamanda qarşılarına çıxa biləcək çətin məsələlərin həll olunmasında daha sürətli düşünməyə yardım edəcəkdir. Təhsil Nazirliyinin keçirdiyi tədbir fənn olimpiada qaliblərinin bir yerə yığılması və onların ən yüksək səviyyədə təltif olunması həm də şagirdlər üçün bu günü, bu qələbənin medallarını unudulmaz edir. Gələcəkdə bundan da yüksək nəticələr əldə etmək üçün bir motivasiya rolu oynayacaq.
Tədbirdə eyni zamanda mən də öz şagirdlik illərimi xatırladım. Çünki mən də 11-ci sinifdə oxuyarkən fənn olimpiadalarında qalib olmuşdum. Məktəbdə oxuduğum müddətdə məhz həmin fənn olimpiadalarında iştirakım və qalib olmağım növbəti illərdə-universitet illərində aldığım nəticələrin daha da yüksək olmasında çox böyük rolu olmuşdur”.
Vüsal Hüseynov millət vəkili
"İlk olaraq respublika fənn olimpiadalrında qalib olan şagirdləri, onların valideyn və müəllimlərini təbrik edirəm. Həmçinin, bu il də olimpiadaların bu il də yüksək səviyyədə, obyektiv meyarlarla və şəffaflıq prinsipi əsasında keçirilməsi münasibətilə təhsil sahəsinda çalışan şəxsləri və bu işdə əməyi olan , dəstək göstərən şəxsləri təbrik edirəm. Olimpiada qaliblərinə göstərilən diqqət və işin təşkili, eyni zamanda digər şagirdləri də belə yüksək nəticələr üçün həvəsləndirir və motivasiya rolunu oynayır.
Bu baxımdan, bu prosesin diqqətdə olması vacibdir. Əminəm ki, bu istedadlı gənclərin gələcək fəaliyyəti də diqqqətdə saxlanılacaq, müvafiq istiqamətlər üzrə dəstək göstərliləcək. Onların ölkəmizin gələcək inkişafına maksimum töhfə verməsi üçün imkanlar təmin ediləcəkdir. Bizim şagirdlər artıq beynəlxalq fənn olimpiadalarında olan qalibiyyətləri artır. Mən ümid edirəm ki, dünənki təltif mərasimindəki qaliblər də ölkəmizi beynəlxalq tədbirlərdə layiqincə təmsil edəcək, bizim ölkəmizin uğurlarını və bu sahədə medallarımızın sayını artıracaqdır”.
Millət vəkili Zahid Oruc
"Təhsil Nazirliyinin orta məktəbləri arasında keçirdiyi olimpiada yarışları təkcə zehni fəaliyyətin aşkarlanması deyil, eləcə də millətin önünə çıxa biləcək aparıcı imkanlarımızı müəyyənləşdirməkdir. Dünənki mərasimə qatılan hər kəs qürurverici bir mərasimdə olduğunun fərqindəydi. Bizim balalarımız ucaldıqları qədər də milləti yüksəldirlər. Bu yarışma beyin işidir, intellektual zəhmətdir, elmin dərinliklərinə baş vurmaq qabiliyyətidir.
Keçirilən tədbirin artıq bir ənənə xarakteri daşıması, onun kontingentinin genişlənməsi, daha çox gənclərimizin bu sıraya qoşulması rəqabət kotentinin şəffaf aparılması ona inam yaradır ki, həmin medalçı insanlarımız millətin qızıl təbəqəsini təşkil etməkdədir. Çox ümidvaram ki, bu insanların hər birinin gələcəkdə elmi karyerası elə qurulacaqdır ki, həmin insanlar xalqın önündə olacaqlar. Bizim iqtisadi və siyasi sferamızda uğurlarını davam etdirəcəklər. Bu tədbirə görə onlara təşəkkür edirəm, uğurlarının davamını diləyirəm”.
S.Xankişiyeva
