Xəbərlər / Müəllim / Ekspert
22 mart 2018
4 887
"Bu müəllimlər işdən azad olunmalıdır" - Ekspert
Ölkəmizdə 4472 orta ümumtəhsil məktəblərində 151 mindən çox müəllimin çalışmasına baxmayaraq onların hamısı ali təhsilli deyil.
Bu sözləri təhsil eksperti Kamran Əsədov müəllimlərin işinə hansı halda xitam verilə biləcəyi haqda sorğumuzu cavablandırarkən bildirib. Onun sözlərinə görə, müəyyən faiz müəllim orta ixtisas təhsili ilə gənc nəslin nümayəndələrinə bilik öyrədir:
"Bu o demək deyil ki, onlar həmişəlik bu vəzifəni yerinə yetirə bilərlər. Lakin bu heç də o demək deyil ki, müəssisə rəhbərliyi istədiyi vaxt kimisə işdən azad edə bilər. İlk növbədə Əmək Məcəlləsində nəzərdə tutulmuş hallar olmalıdır".
K.Əsədov xatırladıb ki, əmək müqaviləsinin müddəti qurtardıqda ona xitam verilir:
"Sonrakı bir həftə ərzində tərəflərdən heç biri müqaviləyə xitam verilməsini tələb etmirsə, həmin əmək müqaviləsi əvvəl müəyyən olunmuş müddətə uzadılmış hesab olunur.
İkincisi, işçinin müəyyən üzrlü səbəbdən iş yerində olmadığı dövrdə müddətli əmək müqaviləsinin müddəti qurtardığı hallarda həmin müqaviləyə işçi işə çıxdıqdan sonra işəgötürənin müəyyən etdiyi gündə, lakin onun işə çıxdığı gündən bir təqvim həftəsi keçməmiş xitam verilə bilər.
Məktəb direktoru tərəfindən işəgötürən tərəfindən zor işlədilərək, hədə-qorxu gələrək, yaxud hər hansı başqa üsulla işçinin iradəsinin əleyhinə əmək müqaviləsini ləğv etməyə onu məcbur etmək qadağandır".
Ekspert 2014-cü ildə bütün müəllimlər üçün etik davranış qaydaları qəbul edildiyini vurğulayıb:
"Müəllim içkili vəziyyətdə dərsə gələrsə, dərs dediyi şagirdlərə, iş yoldaşlarına qarşı əxlaqsız hərəkətlər edərsə bu onun fəaliyyətinə xitam verilməsi üçün əsasdır.
Məktəbin əmlakına bilərəkdən ziyan vurduqda o zərərli ödəməklə işdən azad edilir.
Müəllimin şagirdi ilə hansısa bir sevgi, intim əlaqəsi ola bilməz. Bu kimi hallar baş verərsə həmin müəllimin əmək müqaviləsinə xitam verilir və o bir daha təhsil sahəsində çalışması mümkün deyil". (Axar.az)
