“Artıq oğlanların elmə marağı azalır”
Son illərdə təhsil sistemində qadın müəllimlərin sayında artım, kişi müəllimlərin isə azalma tendensiyası müşahidə olunur. Bu vəziyyət təhsil mühitində balansın pozulması və sosial nəticələrin yaranması ilə bağlı narahatlıq doğurur.
AzTehsil.com xəbər verir ki, məsələ ilə bağlı Milli Məclisin deputatı Ceyhun Məmmədov açıqlamasında bildirib ki, oğlanların təhsilə və elmə marağının azalması gələcəkdə daha ciddi problemlərə yol aça bilər.“Qadınların, qızların təhsilli olması vacibdir. Amma bu gün sürətlə məktəbdə, səhiyyədə, eləcə də dövlət strukturlarında qadınlaşma gedir. Bu o demək deyil ki, Azərbaycan qadını oxumamalıdır, xeyr, onların fəal və təhsilli olması önəmli və qürurvericidir. Amma məsələnin digər tərəfində qadın çoxluğu təhsilə təsir edir. Bunun sosial səbəbləri ciddi araşdırılmalıdır. Bu gün kişi müəllimlərin çoxu məktəbdə yox, digər işlərdə çalışırlar. Qalanı isə repetitorluqla məşğul olur.
Bu ciddi fərqi həll etmək üçün əmək haqqı məsələsinə baxılmalıdır. Təsadüfi deyil ki, son illər müəllimlərin əmək haqqının artırılması üçün dövlət səviyyəsində işlər görülür. Maaşlar yüksək olduğu təqdirdə kişi müəllimlər repetitorluğa yox, məktəblərdə fəaliyyətə üstünlük verəcəklər.
Əgər bu ciddi məsələ indi araşdırılıb, qarşısı alınmazsa, hazırda 30 min olan kişi müəllimlərin sayı növbəti illərdə daha da azalacaq”.
.
