Ümumi təhsil müəssisələrində ocaqçı vəzifəsində çalışan işçilər üçün təlim keçirilib
Ümumi təhsil müəssisələrində ocaqçı vəzifəsində çalışan işçilər üçün təlim keçirilib.
AzTehsil.com xəbər verir ki, Gəncə-Daşkəsən Regional Təhsil İdarəsinin tabeliyində fəaliyyət göstərən ümumi təhsil müəssisələrində çalışan ocaqçılar üçün maarifləndirici təlim təşkil edilib.
Təlimin keçirilməsində məqsəd ocaqçıların iş fəaliyyətində təhlükəsizlik qaydalarına riayət olunmasının təmin edilməsi, yanğın təhlükəsizliyi ilə bağlı zəruri bilik və bacarıqların artırılması, eyni zamanda istilik mövsümünə hazırlıq işlərinin daha səmərəli təşkilidir.
Təlimdə həmçinin pellet sobalarından istifadə qaydaları izah edilib. Qeyd edək ki, ümumi təhsil müəssisələrində odun peçi ilə qızdırılan təhsil müəssisələrində artıq pellet sobalar istifadə ediləcəkdir.
Təlimdə iştirak edən ocaqçılara texniki təhlükəsizlik, yanğın təhlükəsizliyi, əmək və sanitar-gigiyenik normalar, iş rejimi və mövsümə uyğun davranış qaydaları barədə geniş məlumat verilib, onlara praktiki tövsiyələr təqdim olunub.
Sonda iştirakçıların sualları cavablandırılıb və mövzu ətrafında fikir mübadiləsi aparılıb.
