“Chatbot”un əsas məqsədi ...- BUNLARDIR
"Rəqəmsal məktəb" platformasında tətbiqi nəzərdə tutulan süni intellekt əsaslı “Chatbot”un əsas məqsədi ondan ibarətdir ki, şagird dərs prosesində müəllimin tədris etdiyi mövzunu dinlədikdən sonra evdə müəllim əlçatan olmadıqda müxtəlif suallar verə bilsin. Süni intellekt həmin suallara cavab verərək həm şagirdin individual öyrənməsini asanlaşdıracaq, həm də müəyyən mənada müəllimin rolunu tamamlayacaq”.
AzTehsil.com xəbər verir ki, bunu Məktəbəqədər və Ümumi Təhsil üzrə Dövlət Agentliyinin Rəqəmsal idarəetmə sektorunun müdiri Fidan Nəcəfova Təhsil TV-də yayımlanan “Təhsil saatı” verilişində səsləndirib.
O bildirib ki, platformada şagird profilləri də mövcuddur. Hər bir şagird UTİS kodu və valideynin təyin etdiyi şifrə ilə öz profilinə daxil ola bilir: “Şagirdin gördüyü dərs cədvəlləri, ev tapşırıqları və müxtəlif əlavə materiallar bu profildə yerləşir. Birinci yarımilin sonuna qədər“Chatbot” üzərindən, həmçinin müxtəlif elektron resurslar vasitəsilə şagirdin tədrisi mənimsəməsinə dəstək xarakterli funksionallıqlar əlavə ediləcək”.
Xüsusilə ibtidai sinif şagirdləri üçün elektron resurslar hazırlanır. Yuxarı siniflər üçün isə mənimsənilməsi çətin olan fənlərin mövzularında əlavə resurslar, video materiallar yaradılır. Bu resursların əsas məqsədi şagird evdə olarkən müəllimin öyrətdiklərindən əlavə öyrənmək istədikdə və ya təkrar xarakterli materiala baxmaq istədikdə həmin resurslardan yararlanmasına imkan verməkdir”.
Onun sözlərinə görə, bu, bir növ şagirdlərin sərbəst öyrənmə vərdişlərini formalaşdırmaq, həmçinin ibtidai sinif şagirdləri üçün valideynin tədris prosesinin bir hissəsinə çevrilməsinə dəstək məqsədilə yaradılan resurslardır.
