Sinif rəhbərlərinin DİQQƏTİNƏ!
“Bakı şəhərində valideynlərin bu platformada qeydiyyatı 70 faizin üzərindədir. Hələlik valideynlərin təlimi ilə bağlı heç bir qayda nəzərdə tutulmayıb. Çünki valideyn qeydiyyatdan keçdikdən sonra orada edəcəyi xüsusi bir şey yoxdur”.
AzTehsil.com xəbər verir ki, bunu Məktəbəqədər və Ümumi Təhsil üzrə Dövlət Agentliyinin Rəqəmsal idarəetmə sektorunun müdiri Fidan Nəcəfova Təhsil TV-də yayımlanan “Təhsil saatı” verilişində səsləndirib.
O bildirib ki, valideynlər qeydiyyatdan keçdikdən sonra öhdəliyində olan övladlarının profillərini görürlər:
“Sadəcə onların hesablarını aktivləşdirməli və hər bir övlad üçün şifrə təyin etməlidirlər. Bununla da övladlarının profilindən gələn informasiyalara baxmaq imkanı əldə edirlər. Düzdür, burada valideynlər üçün başqa funksiyalar da mövcuddur, ancaq bunlar əlavə təlim tələb etmir”.
O qeyd edib ki, ümumiyyətlə, sentyabrın 15-nə qədər hər bir təhsil müəssisəsinin rəhbəri, tədris işləri üzrə direktor müavini və bir neçə müəllimdən ibarət təlimlər təşkil etdik: “İntensiv şəkildə keçirilən bu təlimlər əsasında hər məktəbdə ən azı 5-6 nəfər var ki, platforma üzrə hazırlıq keçib. Artıq tapşırılıb ki, digər müəllimlər üçün də bu təlimlər təşkil olunsun ki, pedaqoji heyət və idarəedici heyət platformadan istifadə ilə bağlı çətinlik çəkməsin. Bütün bu hazırlıq işləri tamamlandıqdan sonra sinif rəhbərlərinə öhdəlik tapşırılıb ki, müəyyən qədər valideynləri də məlumatlandırsınlar”.
