34 il sonra Qarabağda ilk KONFRANS
Sentyabrın 4-də Qarabağ Regional Təhsil İdarəsi üzrə ənənəvi hesabat xarakterli sentyabr konfransı keçirilib.
AzTehsil.com xəbər verir ki, 34 il sonra Füzuli şəhər Mirzə Uluqbəy adına 1 nömrəli tam orta məktəbdə təşkil edilən konfransın ilk günündə Qarabağ Regional Təhsil İdarəsinin müdiri Sənan Mənsimli, idarənin əməkdaşları və ümumi təhsil müəssisələrinin direktorları iştirak ediblər.
Əvvəlcə Dövlət Himni səsləndirilib, ölkəmizin ərazi bütövlüyü uğrunda canından keçmiş şəhidlərin xatirəsi bir dəqiqəlik sükutla yad olunub.
Konfransda çıxış edən Sənan Mənsimli 2024-2025 ci tədris ilinə dair nəticələrin təhlili, qoyulan hədəflərin hansı dərəcədə yerinə yetirilməsi, eyni zamanda qarşıdan gələn 2025 - 2026-cı tədris ilində qarşıyaqoyulan hədəflərin hansı dərəcədə yerinə yetirilməsi, eyni zamanda qarşıdan gələn 2025 - 2026-cı tədris ilində qarşıya qoyulan hədəflər barədə söz açıb.
Sonra tədrisin keyfiyyəti sektorunun müdiri Anar Şəfiyev çıxış edib. A. Şəfiyev çıxışında məktəblərdə zəif nəticə göstərən şagirdlərin mütəmadi olaraq diqqətdə saxlanılmasından, nəticəni yüksəltmək üçün şagirdlərin hansı standart üzrə zəif olduğunu müəyyən etməyin vacibliyindən danışıb.
Sonra Füzuli-Xocavənd rayonları üzrə təhsil sektorunun müdiri Ramella Məmmədova, Şuşa rayon 1 nömrəli tam orta məktəbin direktoru Səbinə Gözəlova, Əhmədalılar kənd tam orta məktəbin direktoru Arzu Məmmədova çıxış ediblər. Onlar tədrisin keyfiyyətinin artırılması, şagirdlərlə diaqnostik müşahidələrin aparılması, müəllimlərin mütəmadi olaraq siniflər üzrə şagirdlərin nəticələrini təhlil etməsinin vacibliyi iştirakçıların diqqətə çatdırılıb.
Konfransların əsas məqsədi ümumi təhsilin inkişaf istiqamətlərini və qarşıda duran strateji hədəfləri müəyyənləşdirmək, eyni zamanda 2025–2026-cı tədris ili üçün fəaliyyət planını formalaşdırmaqdan ibarətdir. Konfrans zamanı həmçinin ötən tədris ilinin nəticələri təhlil olunur və əldə olunan nəticələr dəyərləndirilir.
Qeyd edək ki, konfransın gündəliyində rəqəmsal bacarıqların artırılması, dərsə davamiyyətin yüksəldilməsi, inklüziv və fərdi yanaşmaların gücləndirilməsi, oxuyub-anlama və riyazi təfəkkürün inkişafı, valideyn iştirakının təlim-tərbiyə prosesində rolunun artırılması kimi mövzulara da toxunulub.
