Attestatla xaricdə təhsilə SON – Cəzalar GƏLİR?
Azərbaycanda ali məktəblərə qəbul ola bilməyən bir çox abituriyentlərin əksəriyyəti ikinci dəfə hazırlaşıb yenidən imtahan vermək əvəzinə, xaricdə təhsili seçirlər. Bu zaman o abituriyentlərin çox xaricdə təhsil vəd edən fırıldaqçılar tərəfindən aldadılır.
Ümumiyyətlə, bu prosesi tənzimləmək üçün hansı addımlar atılmalıdır?
AzTehsil.com xəbər verir ki, mövzu ilə bağlı millət vəkili Ceyhun Məmmədov Bizim.Media-ya açıqlamasında bildirib ki, Azərbaycan qanununa əsasən attestatla qəbul yoxdur:
“Bu prosesin tənzimlənməsi üçün müəyyən addımlar atılır. Əsas səbəb əsgərlikdən yayınmaq, ali təhsilə olan həddən artıq maraqdır. Burda hansı addımlar atılmalıdır?
Əslində bunun tənzimlənməsi üçün son illər ballar aşağı salınır. Amma, bu yetərli deyil. Hesab edirəm ki, burda artıq Azərbaycan qanunvericiliyinə uyğun olaraq addımlar atılmalıdır. Tədbirlər həyata keçirilməlidir. Biz bu istiqamətdə hərəkətə keçməliyik. Bir sözlə Azərbaycan qanunvericiliyinə əsasən attestatla qəbul yoxdur. Bunun edən insanlarla bağlı cəza tədbirləri fikirləşməliyik”, - deyə deputat diqqətə çatdırıb.
Millət vəkili qeyd edib ki, məsələnin bir tərəfi isə illərdir problem kimi özünü göstərən təhsil sahəsində baş tutan dəllallıqdır:
“Bir qrup insanlar var, onlar davamlı olaraq xaricdə təhsil ilə bağlı elanlar paylaşırlar. Çoxlu sayda gəncimizi xaricə oxumaq üçün göndərirlər. Bir sıra hallarda insanları aldadırlar. Onları düzgün məlumatlandirmirlar. Gənclərin bir hissəsi sonrakı mərhələlərdə ciddi problemlərlə üz-üzə qalırlar. Bizim də tövsiyəmiz ondan ibarətdir ki, valideynlər və gənclər belə elanlara aldanıb qurban olmasınlar”, - deyə o bildirib.
Ceyhun Məmmədov sonda diqqətə çatdırıb ki, belə olan halda gənclər gələcəkdə iş tapa bilmir və diplomları tanınmır.
