Müəllimlərin maaşı yay istirahətinə yetir? - SORĞU
Azərbaycanda müəllimlər üçün nəzərdə tutulan əməkhaqqı onların dərs yükü, sertifikasiya nəticələri, iş stajı və işlədikləri bölgəyə görə dəyişir. Əksər müəllimlər aylıq 500-800 manat arasında maaş alsalar da, yüksək dərs saatı və peşəkar göstəricilərə sahib müəllimlər 1000 manatdan artıq əməkhaqqı əldə edə bilirlər. Lakin bu rəqəmlər onların yay aylarını tam istirahətlə keçirməsi üçün bəzən yetərli olmur.
AzTehsil.com müəllimlərin yay istirahəti mövzusunu "AzEdu.az" Təhsil Portalının "Örnək Müəllimlər" layihəsinin iştirakçıları ilə müzakirə edib.
Cəbrayıl rayonu Tatar kənd tam orta məktəbin riyaziyyat müəllimi Murad Rəsulzadənin sözlərinə görə, müəllimlərin maaşı gündəlik ehtiyacları ödəsə də, onların sosial və fərdi rifahını tam qarşılamır:
“Yay tətilində minimal istirahət belə 400-800 manat aralığında xərc tələb edir. Buna görə bir çox müəllim yay aylarını repetitorluq və əlavə işlərlə keçirir. Bu isə istirahətin əsas məqsədi olan enerjini bərpa etməyi çətinləşdirir. İnkişaf etmiş ölkələrdə müəllimlər yay aylarında təhsil və istirahət üçün dəstək alırlar. Azərbaycanda isə bu imkanlardan şəxsi hesabla istifadə olunur ki, bu da çox vaxt mümkün olmur”.
Müsahibimiz onu da əlavə edib ki, bu məsələnin həlli üçün müəllimlərin maaşının mərhələli şəkildə artırılması, yay istirahəti və təlimləri üçün xüsusi təqaüdlərin ayrılması, eləcə də sosial proqramlar çərçivəsində istirahət paketlərinin təqdim olunması daha məqsədəuyğun hesab edilə bilər.
Samux rayonu E.İsgəndərov adına Əhmədbəyli kənd tam orta məktəbin təlim-tərbiyə işləri üzrə direktor müavini İlahə Hüseynova deyib ki, yay aylarını həm istirahət, həm də peşəkar inkişaf üçün fürsət olaraq qiymətləndirir:
“Azərbaycan təbiətinin zəngin bölgələrinə səyahət etmək, sakit mühitdə oxumaq və düşünmək mənim üçün yay tətilinin əsas mahiyyətini təşkil edir. Eyni zamanda, təlimlərdə və müxtəlif layihələrdə iştirak edərək bilik və bacarıqlarımı inkişaf etdirməyə çalışıram. Əməkhaqqım gündəlik ehtiyaclarımı qarşılamaq üçün yetərlidir, lakin əlavə imkanlardan yararlanmaq üçün daim öz üzərimdə çalışıram”.
