Şagirdin attestat qiyməti ilə bağlı - AÇIQLAMA

İmtahanda yüksək bal toplayan şagirdin attestat qiyməti niyə aşağı olub? - İdarədən açıqlama.Abşeron rayon Masazır kənd 4 nömrəli tam orta məktəbin XI sinif şagirdinin 2024–2025-ci tədris ilində məktəbdə keçirilən qiymətləndirmələrdə iştirakı ilə bağlı müəyyən edilib ki, o, bir sıra fənlər üzrə summativ qiymətləndirmələrdə (KSQ) üzürsüz səbəbdən iştirak etməyib.

AzTehsil.com xəbər verir ki, bu barədə Teleqraf-ın sorğusuna cavab olaraq Abşeron-Xızı Regional Təhsil İdarəsindən məlumat verilib.

Bildirilib ki, Nazirlər Kabinetinin 2016-cı il tarixli qərarı ilə təsdiq edilmiş “Ümumi təhsil pilləsində təhsilalanların yekun attestasiyasının aparılması Qaydaları”na əsasən, buraxılış imtahanı aparılan hər bir fənn üzrə şagirdin buraxılış sinfinin yekun (illik) qiyməti və buraxılış imtahanının balı, buraxılış imtahanı aparılmayan hər bir fənn üzrə şagirdin buraxılış sinfinin yekun (illik) qiyməti təhsil sənədinə yekun qiymət olaraq yazılır.

"Bununla yanaşı, Nazirlər Kabinetinin müvafiq qərarı ilə təsdiq edilmiş “Ümumi təhsil pilləsində təhsil haqqında dövlət sənədlərinin nümunələri və onların verilməsi Qaydası”na əsasən, ümumi orta təhsil haqqında attestata və tam orta təhsil haqqında attestata təhsil müddətində hər bir fənn üzrə tədris olunan saatların ümumi miqdarı, təhsilalanın yekun attestasiyasının nəticələri (illik və imtahan) rəqəm və sözlə yazılır", - məlumatda deyilir.

Qeyd edək ki, sosial şəbəkələrdə Masazır kənd 4 nömrəli tam orta məktəbin XI sinif şagirdinin buraxılış imtahanından 96 bal topladığı halda attestatına aşağı qiymətlər yazıldığı haqda məlumatlar paylaşılır.