BSU-da ETİRAZLAR
Akt zalında imtahan tələbələrin narazılığına səbəb oldu - BSU-da etirazlar
Bakı Slavyan Universitetində (BSU) 2024/2025-ci tədris ilinin yaz semestr imtahan sessiyası 2 iyun tarixindən etibarən başlanıb. Lakin tələbələr imtahanların akt zalında keçirilməsindən narazıdırlar.
AzTehsil.com xəbər verir ki, azEdu.az-a müraciət edən bir qrup tələbə bildirib ki, akt zalında mövcud şərait həm fiziki, həm də psixoloji baxımdan onlara çətinlik yaradır. Tələbələrin sözlərinə görə, zalda oturacaqların narahat olması, sıralar arasındakı məsafənin məhdudluğu imtahan zamanı onların diqqətini yayındırır və gərginliyə səbəb olur.
Onlardan biri bildirib:
“Orta sıralarda əyləşib imtahan verdiyim halda, imtahanı tez bitirib çıxmaq istəyəndə həm mənim üçün, həm də digər iştirakçılar üçün çətin vəziyyət yaranacaq. Bu şəraitdə imtahan vermək mümkün olmayacaq".
Mövzu ilə bağlı AzEdu.az Bakı Slavyan Universitetinə sorğu ünvanlayıb.
Sorğuya cavab olaraq bildirilib ki, sessiyanın yüksək səviyyədə təşkili məqsədilə bütün zəruri hazırlıq işləri görülüb.
“Cari sessiyada imtahanlar ilk dəfə olaraq akt zalında keçirilir. Zalda tələbələrin rahatlığı və şəffaflığın təmin olunması üçün bütün zəruri infrastruktur yaradılıb. Akt zalında havalandırma və səs izolyasiya sistemi də yenilənib. Tələbələr üçün oturacaqlar arası məsafə sosial məsafə prinsiplərinə tam uyğun şəkildə təşkil olunub. Belə ki, hər 2 nəfərdən bir tələbələrin giriş-çıxışının rahat təmin olunması üçün məsafələr saxlanılıb".
Qurumdan bildirilib ki, universitet rəhbərliyi imtahan öncəsi zalda monitorinq apararaq son hazırlıq işlərini yoxlayıb. İmtahanların şəffaf keçirilməsi məqsədilə nəzarətçilərə təlimlər keçirilib və sessiya müddətində apellyasiya komissiyası da fəaliyyət göstərir.
Bununla yanaşı, son günlərdə yayılan “qadın tələbələrin saç rezini ilə əlaqədar olaraq imtahan zalından çıxarılması” iddialarına da münasibət bildirilib.
Universitet bu barədə heç bir faktın qeydə alınmadığını açıqlayıb.
Qeyd edək ki, imtahan sessiyası iyul ayının ilk həftəsinə qədər davam edəcək.
