Payız semestrinin imtahan sessiyası-bilik yeganə meyardır

Azərbaycan Respublikasının Təhsil naziri cənab Mikayıl Cabbarovun "İmtahan sessiyasının təşkili və keçirilməsi barədə” imzaladığı müvafiq əmrə uyğun olaraq Azərbaycan Dövlət Pedaqoji Universitetində (ADPU) də 2016-2017-ci tədris ilinin payız semestrinin imtahan sessiyası keçirilir. Yanvar ayının 5-dən başlayan imtahan sessiyasının mövcud qaydalara uyğun təşkil edilməsi, tələbələrin biliyinin qiymətləndirilməsində şəffaflığın və obyektivliyin təmin olunması, imtahan sessiyasının mövcud normativ sənədlər əsasında keçirilməsi, daxil olan hər bir şikayətin qısa müddətdə çevik şəkildə araşdırılıb lazımi ölçü götürülməsi üçün bütün zəruri tədbirlər həyata keçirilir. Eyni zamanda imtahan prosesini tələbələrin valideyinlərinin, ictimaiyyət nümayəndələrinin, qeyri-hökumət təşkilatlarının təmsilçilərinin, kütləvi informasiya vasitələri nümayəndələrinin izləmələri üçün lazımi şərait yaradılıb. Biz də yanvar ayının 11-də imtahanlar keçirilən zallarda, Kompüter Mərkəzində, eləcə də İmtahan qərargahında və Apelyasiya Komissiyasında olaraq imtahan prosesinin gedişi və daxil olan müraciətlərlə maraqlandıq. 

 

 

Qeyd edək ki, imtahanlar hər gün vaxtında başlayır, imtahan prosesi yaxşı təşkil edilib. İmtahan prosesində nizam-imtizam, səliqə-sahman, şəffaflıq təmin edilib. İmtahan prosesinə heç bir kənar müdaxilə yoxdur, tələbələrə biliklərini nümayiş etdirmək üçün bütün şərait yaradılıb. Tələbələr onlar üçün yaradılmış şəraitdən istifadə edərək sərbəst və rahat şəkildə imtahan verirlər.

 

Məlumat üçün bildirək ki, gün ərzində 1800 nəfər tələbə yazılı qaydada, 1200 nəfər tələbə isə VTS-TEST sistemi üzrə Kompüter Mərkəzində imtahan verirlər.

İmtahan qərargahının rəhbəri, dosent Nailə Hüseynovanın verdiyi məlumata görə, bugünədək 58 nəfər tələbə qərargaha müraciət edib. Bu müraciətlərin 52-si yazılı qaydada verilən imtahanlardan, 6-sı isə test üsulu ilə verilən imtahanlardan olub. Müraciətlər çevik şəkildə və diqqətlə araşdırılıb. Yazılı qaydada verilən imtahanlarla bağlı edilən 52 müraciətin 7-si tələbələrin xeyrinə həll edilib, müraciət edən digər tələbələrin isə imtahan zamanı davranış qaydalarına əməl etmədiklərinə, üzərlərində mobil telefon və ya digər köməkçi vasitələr aşkar olunduğuna görə onlar imtahandan kənarlaşdırılaraq protokollaşdırılıb və imtahan cavabları ləğv edilib.

 

 

  

Test üsulu ilə verilən imtahanlarla bağlı edilən 6 müraciət tələbələrin xeyrinə həll edilib. ADPU-nun Ağcabədi Filialından edilən 1 müraciətin isə bu gün araşdırılması nəzərdə tutulur. Apelyasiya Komissiyasının sədri, dosent İradə Qasımovanın və sədr müavini, tarix üzrə fəlsəfə doktoru Vurğun Məmmədovun verdikləri məlumata görə, bugünədək komissiyaya yazılı qaydada verilən imtahanlarla bağlı 25 müraciət daxil olub.  

 

 

 

Daxil olan müraciətlərdən 8-i tələbələrin xeyrinə həll edilib, 7-si hazırda araşdırılır, digər müraciət edən tələbələr isə öz imtahan nəticələri ilə razılaşıblar. Test üsulu ilə verilən imtahanlarla bağlı isə 26 müraciət daxil olub. Müvafiq araşdırmalar nəticəsində həmin müraciətlərin 4-ü tələbələrin xeyrinə həll edilib, digər müraciət edən tələbələr isə öz imtahan nəticələri ilə razılaşıblar. Qeyd edək ki, imtahan zamanı qarşıya çıxan çətinliklərin həlli üçün lazımi addımlar atılır. Tələbələrin biliyinin qiymətləndirilməsi zamanı da şəffaflıq və obyektivlik təmin edilir, tələbələr imtahanda göstərdikləri nəticələrə görə qiymətləndirilirlər. Bütün imtahanların nəticələri günün sonunda ADPU-nun İnternet saytına yerləşdirilir. 

 

 

 

 ADPU-nun rektoru, professor Cəfər Cəfərov hər gün bir neçə dəfə auditoriyalarda olaraq imtahan prosesini müşahidə edir. İmtahanların çevik, şəffaf və obyektiv keçirilməsi rektorun diqqət mərkəzindədir.