Hüseyn İsmayılov “Sabahın alimləri” XIV Respublika layihə müsabiqəsində 1-ci yerə layiq görülüb.
Gəncə şəhər İ.Məmmədov adına 27 nömrəli məktəb-liseyin XI sinif şagirdi Hüseyn İsmayılov “Sabahın alimləri” XIV Respublika layihə müsabiqəsində 1-ci yerə layiq görülüb. Hüseyn müsabiqədə komputer elmləri nominasiyası üzrə "ALS və İflic xəstələri üçün CNN ilə dəstəklənən ucuz qiymətli göz hərəkəti ilə cihaz idarəetmə sistemi" layihəsi ilə iştirak edib.
AzTehsil.com xəbər verir ki, müsabiqənin keçirilməsində məqsəd elmi-tədqiqat və yaradıcılıq potensialı olan istedadlı şagirdləri aşkara çıxarmaq, onlarda tənqidi düşünmə, problem həlletmə, vaxtın idarə olunması, natiqlik və ünsiyyət kimi bacarıqları inkişaf etdirmək, ali təhsil müəssisələri və elmi təşkilatlarla ümumi təhsil müəssisələri arasında əlaqələri genişləndirmək, həmçinin şagirdlərin oxşar maraqları olan həmyaşıdları ilə şəbəkələşməsini təmin etməkdir.
Qeyd edək ki, müsabiqə Elm və Təhsil Nazirliyi, Heydər Əliyev Mərkəzi, Təhsil İnstitutu, Azərbaycan Milli Elmlər Akademiyası (AMEA), Azərbaycan Təhsil İşçiləri Azad Həmkarlar İttifaqı Respublika Komitəsinin təşkilatçılığı və tərəfdaşlığı ilə keçirilib.
