Məktəbə bıçaq gətirən şagirdlər - Hansı tədbirlər görülür...

AzTehsil.com xəbər verir ki, Son həftələrdə ölkənin müxtəlif bölgələrində yerləşən orta məktəblərdən gələn xəbərlər valideynləri, müəllimləri və bütövlükdə cəmiyyəti ciddi narahat edir.

Sosial şəbəkələrdə və yerli informasiya resurslarında yayılan məlumatlara görə, məktəblərdə bıçaqlanma halları qeydə alınıb. Ən narahatedici məqam isə ondan ibarətdir ki, bəzi hallarda şagirdlər kəsici-deşici alətlərlə məktəbə daxil ola bilirlər.

“Ümumi təhsil müəssisələrində şagird davranış qaydaları”na görə, aşağıdakı əşyaları ümumi təhsil müəssisəsinə gətirmək qadağandır: kəsici və deşici alətlər, təhlükəli, zəhərli və ya tez alışan maddələr, kibrit və alışqanlar, siqaret (elektron siqaret), saqqız, spirtli içkilər, təsbeh və zinət əşyaları kimi aksesuarlar, qanunla istifadəsi və dövriyyəsi qadağan olunmuş maddələr.

Ancaq yayılan xəbərlərdən görünür ki, bəzi məktəblərdə hələ də bu qaydalara riayət edilmir və bununla bağlı nəzarət tədbirləri görülmür.

Mövzu ilə bağlı Məktəbəqədər və Ümumi Təhsil üzrə Dövlət Agentliyi məlumat yayıb.

Qurumdan bildirilib ki, ümumi təhsil müəssisələrində təlim - tərbiyə işinin düzgün təşkili, daxili nizam-intizam qaydalarına əməl olunmasına nəzarətin artırılması və təhlükəsizlik tədbirlərinin gücləndirilməsi məqsədilə monitorinqlər həyata keçirilir.

Keçirilən monitorinqlər çərçivəsində məktəblilərin “Ümumi təhsil müəssisələrində şagird davranış qaydaları”na əməl etməsi vəziyyəti müşahidə olunur, məktəbə gətirilməsi qadağan olunan əşya və ləvazimatlar haqqında maarifləndirmə işi aparılır.

Məlumatda bildirilib ki, şagirdlərin çantalarında tədris prosesinə uyğun olmayan əşyalar aşkarlanarsa, həmin əşyalar məktəb rəhbərliyi tərəfindən götürülür:

“Şagirdlərin valideynləri məktəbə dəvət olunur, məktəb rəhbərinin iştirakı ilə valideynlə görüş keçirilir. Görüşdə tədris prosesinə uyğun olmayan, şagirdlərin həyat və sağlamlığı üçün təhlükəli və zərərli əşyaların məktəbə gətirilməsinin qadağan olması bir daha diqqətə çatdırılır və əşyalar valideynlərə təhvil verilir.

Qeyd edək ki, ümumi təhsil müəssisələrində sağlam-emosional mühitin, eyni zamanda təhlükəsizliyin təmin edilməsi məqsədilə Məktəbəqədər və Ümumi Təhsil üzrə Dövlət Agentliyi tərəfindən digər aidiyyəti qurumlarla birlikdə tədbirlər planına uyğun olaraq mütəmadi maarifləndirici görüşlər həyata keçirilir”.