Goranboyda məktəbdə insident olub, müəllimə xəsarət yetirilib
Goranboyda orta məktəbdə insident baş verib.
AzTehsil.com xəbər verir ki, APA-nın yerli bürosu bu haqda məlumat yayıb. Hadisə Hazırəhmədli kənd tam orta məktəbinin inzibati binasında qeydə alınıb.
Kənd sakini 1999-cu il təvəllüdlü Əfsanə Rzayeva Hazırəhmədli kənd tam orta məktəbinin binasına daxil olaraq bıçaqla müəllimin əlinə xəsarət yetirib. Həmçinin onun şagirdlərə də xəsarət yetirməyə cəhd etdiyi bildirilir.
DİN-in Mətbuat Xidmətinin regional qrupun baş inspektoru Eşqin Qasımov APA-ya bildirib ki, Goranboy Rayon Polis Şöbəsinə rayonun Hazırəhmədli kənd sakini olan bir nəfər qadın valideynin kəsici-deşici alətlə məktəbə gəlməsi, övladını döyməsi və onu sakitləşdirmək istəyən müəllimə xəsarət yetirməsi barədə məlumat daxil olub.
Polis əməkdaşları məktəbə gələrək müvafiq tədbirlər həyata keçirib. Hadisəni törətməkdə şübhəli Ə. Rzayeva saxlanılıb.
Faktla bağlı araşdırma aparılır.
