Körpələriniz niyə ağlayır? – Cavabı şagirdlərin hazırladığı xüsusi cihaz deyəcək
Sumqayıt məktəbliləri Aişa İsrafilova və Ağalar Əliyev "BabyMind" adlı layihə ilə “Sabahın alimləri” XIV Respublika Layihə Müsabiqəsində gümüş medala layiq görülüblər. Yeniyetmələr Milli Qəhrəman Polad Həşimov adına 28 nömrəli tam orta məktəbin XI sinif şagirdləridir. Onların elmi rəhbəri məktəbin fizika müəllimi Mehriban Abbasovadır.
Layihə barədə AzTehsil.com-a danışan Aişa və Ağalar deyir ki, bu ideyanı ətraflarındakı valideyn və körpələrin qarşılaşdığı çətinlikləri müşahidə edərkən düşünüblər. Onlar bir gün bir ananın ağlayan körpəsini sakitləşdirməyə çalışdığını, lakin bunun səbəbini anlamadığını görüblər. Məhz həmin an körpələrin ağlama səbəblərini təhlil edən bir cihazın olmasının valideynlər üçün nə qədər faydalı ola biləcəyini anlayıblar.
Aişa İsrafilova bu barədə belə deyir : "Biz hazırladığımız texnologiyanın problemi həll etməkdə faydalı ola biləcəyini düşündük və bu sahəni araşdırmağa başladıq. Beləliklə, 8 ay ərzində layihəmizi inkişaf etdirdik və müsabiqəyə təqdim etdik. Analar bu cihazı kompüterə taxaraq uşaqın yanına qoyur və nəticədə uşaqın səsi mikrofona daxil olur və cihaz onun səsini analiz edib valideynə ekranda uşağın ağlama səbəbini, probleminin nə olduğunu müəyyənləşdirməyə kömək edir”.
Ağalar Əliyev layihəni gələcəkdə daha geniş istifadəyə verilməsini nəzərdə tutduqlarını deyir: "Biz bu layihənin təkcə Azərbaycanda deyil, bütün dünyada valideynlərə yardım edəcəyini düşünürük. Ona görə “Sabahın alimləri” müsabiqəsinə qatılmağa qərar verdik və gələcəkdə layihəni daha da təkmilləşdirəcəyik”.
İlk dəfə bu müsabiqədə iştirak edən Aişa və Ağalar nəticələr elan olunarkən həyəcan içində olduqlarını söyləyirlər. Layihələri ikinci yerə layiq görülərək gümüş medal qazandıqda isə həyəcanları qürur və sevinc hissinə çevrilib. Aişa yaşadıqları həmin xoş anlardan söz açır: “Əldə etdiyimiz uğur uzun müddət davam edən əmək və səylərimizin mükafatı oldu. Məktəbimizin Milli Qəhrəman Polad Həşimovun adını daşıması bizə əlavə məsuliyyət hiss etdirirdi və bu nailiyyət bizim üçün böyük motivasiya oldu”.
