Ölkəmizdə müəllim əməyinə həmişə yüksək qiymət verilir

Zaqatala şəhərindəki 3 nömrəli tam orta məktəbin direktoru Elmira Hacıyeva Beynəlxalq Müəllimlər Gününü ikiqat bayram sevinci ilə qeyd edib. Prezident İlham Əliyevin oktyabrın 3-də imzaladığı Sərəncamla Azərbaycan təhsilinin inkişafında xidmətlərinə görə o, "Əməkdar müəllim” fəxri adına layiq görülüb.

Sevinc hisslərini bölüşən Elmira Hacıyeva deyib: "Sevincimin həddi-hüdudu yoxdur. Bu, təkcə mənim əməyimə verilən qiymət deyil, eyni zamanda, çalışdığım pedaqoji kollektivə, Zaqatala təhsilinə verilən yüksək qiymətdir. 43 ildir ki, təhsil sahəsində çalışıram. Mənə verilən bu yüksək fəxri ada görə Prezidentimizə dərin minnətdarlığımı bildirirəm. Çalışacağam ki, bu etimadı layiqincə doğruldum”.

Rəhbərlik etdiyi məktəbin yaxşı təhsil ənənələrinə malik olduğunu vurğulayan Elmira Hacıyeva bildirib ki, ötən tədris ilində məktəbi 72 məzun bitirib. Onlardan 57 nəfəri ali məktəblərə sənəd verib, 41-i tələbə adını qazanıb. Eyni zamanda, 8 nəfər orta ixtisas məktəblərinə daxil olub. Məktəbin məzunlarından Fazil Səfərov imtahanlarda 690 bal toplayaraq birinci ixtisas qrupu üzrə respublikada ikinci nəticə göstərməyə müvəffəq olub. Məzun on birinci sinfin buraxılış imtahanında 290 bal, qəbul imtahanında isə maksimum nəticə – 400 bal toplayıb.

Ölkəmizdə müəllim əməyinə həmişə yüksək qiymət verildiyini bildirən məktəb direktoru deyib: "Təhsil işçilərinin sosial rifahının, maddi vəziyyətinin yaxşılaşdırılması üçün davamlı tədbirlər həyata keçirilir. Prezidentimizin müvafiq sərəncamları ilə son bir neçə ildə müəllimlərin əməkhaqları dəfələrlə artırılıb. Dövlətimizin başçısının bu il iyunun 18-də imzaladığı Sərəncamla müəllimlərin əməkhaqlarının sentyabrın 1-dən növbəti dəfə 20 faiz artırılması məktəbimizin kollektivi tərəfindən də böyük razılıq hissi ilə qarşılanıb. Bütün bunlar ölkə rəhbərliyinin təhsilin inkişafına, müəllimlərə göstərdiyi diqqət və qayğının bariz nümunəsidir”

azertag.az