Riyaziyyatçılar Bakıda toplaşacaq - 43 ölkədən 243 alimin iştirakı ilə beynəlxalq konfrans keçiriləcək

27-30 avqust tarixlərində Bakı Dövlət Universitetində (BDU) universitetin 100 illik yubileyinə həsr olunan "Riyaziyyat və onun tətbiqləri” 8-ci Beynəlxalq Avrasiya Konfransı (IECMSA-2019) keçiriləcək.

BDU-dan verilən məlumata görə, universitetin əsas tərəfdaşlığı və Türkiyənin Sakarya Universiteti, Beynəlxalq Balkan Universiteti, Firat Universiteti, Təkirdağ Namiq Kamal Universiteti, Kocaeli Universiteti, Amasya Universiteti, Qazi Universiteti və Türk Dünyası Riyaziyyat Cəmiyyətinin dəstəyi ilə baş tutan konfrans bundan əvvəl Kosovo, Bosniya və Herseqovina, Avstriya, Yunanıstan, Serbiya, Macarıstan və Ukraynada təşkil olunub.

Beynəlxalq konfransa 43 ölkədən 243 elmi məruzə daxil olub

Konfransın plenar iclasında Almaniyanın Bergakademie Freiberg Texniki, ABŞ-ın Mərkəzi Florida, Birləşmiş Ərəb Əmirliyinin Şarcah Amerikan, Türkiyənin Koç, İtaliyanın Bari Aldo Moro, Avstraliya Federasiya və Bakı Dövlət Universitetlərinin, o cümlədən Rumıniyanın Simion Stoilou Riyaziyyat İnstitutunun alimlərinin məruzələri dinləniləcək.

Konfransın əsas məqsədi akademik fikir və son tədqiqat işlərinin mübadiləsi üçün bir forum təşkil etməklə riyaziyyatın müxtəlif sahələrində tədqiqat aparan elm adamlarını bir araya gətirmək, onları birgə tədqiqata təşviq etmək və həvəsləndirməkdir.

Konfransda yeni nəticələr və gələcək çağırışlar, plenar, dəvətli və builki məruzələr təqdim ediləcək.

Konfransın əsas işçi dili ingilis dilidir. Təqdim olunacaq məruzələr üzrə məqalələr toplu şəklində və indekslənən jurnallarda nəşr olunacaq.azedu.az