BSU-nun rektoru Strateji İnkişaf Planının yenilənmiş redaksiyasının layihəsinin təqdimatını edib
Noyabrın 28-də İsmayıllı rayonunda keçirilən Bakı Slavyan Universitetinin növbəti komanda toplantısı (timbildinq) zamanı universitetin Anar Nağıyev Strateji İnkişaf Planının (SİP) yenilənmiş redaksiya layihəsinin təqdimatını edib.
AzTehsil.com xəbər verir ki, çıxışı zamanı BSU-nun rektoru Anar Nağıyev universitetdə tələbə–müəllim əlaqələrinin səmərəli qurulmasının, eləcə də SİP-dən irəli gələn tələblərin tədris prosesində öyrənənlərin ehtiyaclarına uyğun şəkildə həyata keçirilməsinin vacibliyini diqqətə çatdırıb.
Rektor bildirib ki, müasir metodologiya və tədris texnologiyalarının tətbiqi təhsil prosesinin keyfiyyətinin yüksəldilməsində mühüm rol oynayır. O, həmçinin universitetin güclü və zəif tərəflərinin doğru müəyyən edilməsinin strateji inkişaf baxımından xüsusi əhəmiyyət daşıdığını vurğulayıb. A.Nağıyev çıxışında keyfiyyət mədəniyyətinin formalaşdırılması, müəllimlərin özünüqiymətləndirmə fəaliyyətinin gücləndirilməsi və bu istiqamətdə sistemli işin aparılmasının vacibliyini qeyd edib.
Anar Nağıyev universitetin missiyasının və məqsədlərinin aydın müəyyənləşdirilməsinin strateji inkişaf üçün əsas şərt olduğunu bildirib. O, tədqiqat tələblərinin düzgün formalaşdırılması, real hədəflərin müəyyən edilməsi, rəqabətədavamlı universitet modelinə keçid üçün görülməli işlərin dəqiq planlaşdırılmasının zəruriliyini diqqətə çatdırıb. Rektor vurğulayıb ki, müasir təhsil sistemində tələbə mərkəzdə dayanır və Milli Kvalifikasiyalar Çərçivəsi ömürboyu öyrənmə prinsipini əsas götürür.
Eyni zamanda rektor son illərdə BSU-da tələbə qəbulu dinamikasının artdığını da qeyd edib.
