MEK fondlarında mühafizə olunan çap və rəqəmsal ensiklopediyaların təqdimatını keçirib
AMEA Mərkəzi Elmi Kitabxanası (MEK) fondlarında mühafizə olunan çap və rəqəmsal ensiklopediyaların təqdimatını keçirib.
Təqdimatı İnformasiya resurslarına nəzarət və əlaqələndirmə şöbəsinin müdiri Günel Əhədova edib. G.Əhədova kitabxanada mövcud olan eksiklopediyalar haqqında geniş məlumat verib.
Qeyd olunub ki, yunan sözü olan, biliklər dairəsi mənasını verən ensiklopediyalar öz məzmununa görə universal, universal-milli və sahəvi biliklər üzrə yaradılır. Ensiklopediyalarda materiallar əlifba sırası ilə, tək-tək hallarda isə mövzuya görə düzülür. Universal ensiklopediyalarda ümumi bilgilər əks olunur, xüsusi ensiklopediyalarda isə bir sahə üzrə mövzular dərinliyinə qədər izahını tapır. Ensiklopediyaların yaranma tarixi barədə geniş məlumat verən təqdimatçı tərəfindən Azərbaycanda nəşr edilən ensiklopediyaların xronoloji ardıcıllığı göstərilib.
G.Əhədova MEK-in Nadir kitab fondunda bütün elm sahələrini əhatə edən universal xarakterli ensiklopediyaların slaydlı təsnifatını çatdırıb. Rus dilində XIX əsrdə Brokqauz və Efron tərəfindən nəşr olunmuş 82 cilddən ibarət ensiklopedik lüğət, XIX əsrdə nəşr olunan 44 cildlik "Qranat", 1875-ci ildə ingilis dilində nəşr edilmiş 20 cilddə "Britanika", 1944-cü il nəşri olan 28 cilddən ibarət Amerikan ensiklopediyası, London nəşri olan 14 cildlik "Yeni universal ensiklopediya", alman dilində 1977-ci ildə nəşr olunmuş 15 cildlə "Mayerin yeni lüğəti", fransız dilində isə "P.Larousse" "Qrand ensiklopedi", "Universales" ensiklopediyaları, 1994-cü ildə nəşr edilən 22 cilddən ibarət "Dünya kitabı" ensiklopediyaları oxucuların tez-tez müraciət etdiyi biliklər məcmuəsidir.
Daha sonra Azərbaycan Milli Ensiklopediyasından, onun çox dəyərli vəsait olmasında bəhs edilib. Qeyd olunub ki, ensiklopediyada ölkənin bütün həyatı, elm və mədəniyyət sahəsi, iqtisadi inkişafı, dövlətimizin qazandığı nailiyyətlər əks olunub. Cildlərin hazırlanmasında Azərbaycan Respublikasının nazirlikləri, komitələri və digər dövlət qurumlarının təqdim etdiyi materiallardan istifadə edilib.
"Musiqi dünyası” jurnalının baş redaktoru, Bakı Musiqi Akademiyasının kafedra müdiri, professor Tariyel Məmmədov müasir dövrdə multimedia janrına daha çox üstünlük verildiyini, musiqiyə aid ensiklopediyaların tərtibatında bu məsələyə diqqət yetirdiklərini bildirib. Alim, kitabxanaya Azərbaycan, rus və ingilis dillərində işlənmiş yeni nəşrləri "İzahlı səs-söz lüğəti”, "İzahlı muğam lüğəti” kitablarını hədiyyə edib. Bakı Dövlət Universitetinin müəllimi, tədqiqatçı Nazim Tapdıqoğlu təqdimatda adı çəkilən, müəllifi olduğu "Xocalı toponimləri və Xocalı faciəsi qurbanları: qısa ensiklopedik məlumat kitabı”nda yer alan mövzuların araşdırılması prosesindən danışıb. Müəllif Azərbaycanın müxtəlif bölgələrinə aid bir neçə ensiklopedik kitabını da MEK-ə hədiyyə edib.
"Şərq-Qərb” nəşriyyatının direktor müavini Sevil İsmayılova təqdim olunan ensiklopedik ədəbiyyatın böyük əksəriyyətinin təmsil etdiyi nəşriyyatda çap edildiyini bildirib. Azərbaycan Milli Ensiklopediyasının kitabxana müdiri Leyli Abbasova rəhbərlik etdiyi kitabxanada xidmətin yaxşılaşdırılması üçün bütün ensiklopedik materialların toplanılmasının vacibliyinə diqqət yönəldib.
Tədbirin sonunda Mərkəzi Elmi Kitabxananın direktoru Leyla İmanova bildirib ki, fondda olan ensiklopedik mənbələrə sistemli şəkildə yanaşmaqda və təqdim etməkdə məqsəd vəsaitləri oxucuların diqqətinə çatdırmaqdır. Direktor kitabxananın qarşısına qoyduğu strateji hədəfdən, Milli Rəqəmsal Yaddaş layihəsindən və onun üstünlüklərindən söhbət açıb.
L.İmanova Azərbaycanın tarixinə və mədəniyyətinə aid zəruri vəsaitlərin bu bazada öz əksini tapması üçün müəlliflərdən, tərtibçilərdən kitabların Azərbaycan dili ilə yanaşı digər vacib dillərdə də yazılmasının və elektron variantda kitabxanaya təqdim edilməsinin vacibliyinə diqqət çəkib. L.İmanova Mərkəzi Elmi Kitabxananın Azərbaycan kitabxanaları arasında ilk müəllif hüquqü imzalayan kitabxana olduğunu qeyd edib.
İşğal edilmiş torpaqlarda müharibənin qurbanı olan və Xocalıda qətlə yetirilən insanların tam siyahısının Milli Rəqəmsal Yaddaş bazasına salınması, Vikipediyada dəqiq əks olunması üçün müəllifləri əməkdaşlığa dəvət edən L.İmanova kitabxanada multimedia fondunun da zənginləşməsi barədə danışıb və yaxın gələcəkdə fondda toplanan materialların təqdim ediləcəyini bildirib.
