"İmişlidə bu məktəblərdə problemlər var" - Səyyad Aran

“İmişli rayon 1 saylı tam orta məktəbində ciddi sıxlıq var”.

AzTehsil.com xəbər verir ki, bunu Milli Məclisin plenar iclasında “Azərbaycan Respublikasının 2026-cı il dövlət büdcəsi haqqında” qanun layihəsinin müzakirəsi zamanı millət vəkili Səyyad Aran deyib.

Deputat bildirib ki, İmişlinin Asya hissəsində yerləşən məktəb əhalinin ən sıx məskunlaşdığı ərazidədir və burada gündə orta hesabla 1500-ə yaxın şagird dövriyyəsi olur:

“238 otağı və yaxşı infrastrukturu olsa da, məktəb saat 8-dən axşam 18:00-a qədər tam yüklənmiş vəziyyətdə çalışır. Hətta iki növbənin öhdəsindən gəlməkdə çətinlik yaranır. Mən bir müddət əvvəl təklif etmişdim ki, modul tipli əlavə məktəblər salınsın, ibtidai siniflər əsas binadan çıxarılsın. Bu həm təhlükəsizliyə, həm də tədrisin keyfiyyətinə müsbət təsir edər”.

Səyyad Aran məktəbin təsərrüfat məsələlərinə də toxunaraq əlavə edib ki, binada çoxlu sayda köhnə masa, stul, şkaf və digər əşyalar var, lakin məktəb rəhbərliyi onları silinmə aktı olmadan inventardan çıxarmağa cəsarət etmir:

"Məktəbin rəhbəri ehtiyat edir ki, sonradan məsuliyyət məsələsi yarana bilər”.

Deputat daha iki təhsil müəssisəsinin, Çaxırlı və Bəhrəmtəpə-Hacırəbəbi kənd tam orta məktəblərinin vəziyyətinə toxunub. O, bu məktəblər üçün əvvəllər görülən işlərin mətbuatda əks olunduğunu xatırladaraq bildirib ki, hazırda onların ən böyük problemi stadion məsələsidir:

“Bəhrəmtəpə futbol məktəbi Azərbaycan futboluna Qaradağ klubunun və milli komandanın üzvü Bəhlul Mustafazadə kimi oyunçu bəxş edib. Bu regionda futbolun inkişafı üçün potensial böyükdür, lakin şərait qənaətbəxş deyil. Stadionun mühafizəsinin təmin edilməsi, həmçinin cüzi inventar – bir neçə set formalar, 5–6 top, 2 qapı toru və digər avadanlıq verilsə, nəticələr daha yaxşı olar”.

Millət vəkili sonda qeyd edib ki, sözügedən problemlər böyük maliyyə tələb etmir, lakin onların həlli təhsilin keyfiyyətinə və şagirdlərin inkişafına ciddi təsir göstərəcək.