Məktəblərdə yalnız şəffaflığı artırmaq ....- Ekspert
Hazırda Azərbaycanda 600 məktəbdə direktor vəzifəsi boşdur. Bütün bunlara səbəb kimi mürəkkəb seçki prosedurları qeyd edilir.
Bəs direktorların seçilməsi prosesindəki bu problemlər məktəblərdə təhsilin səviyyəsinə necə təsir göstərir?
AzTehsil.com xəbər verir ki, mövzu ilə bağlı açıqlama verən təhsil eksperti Kamran Əsədov bildirdi ki, Azərbaycanda məktəb direktorlarının seçilmə mexanizminin yenilənməsi zərurəti uzun illər təhsil sistemində müşahidə olunan struktur və idarəetmə problemlərindən qaynaqlanır:
"Məktəb rəhbərliyinin keyfiyyəti təhsilin səviyyəsinə birbaşa təsir edən əsas amillərdən biridir. Direktorun idarəçilik bacarığı, qərarvermə qabiliyyəti, sosial mühit yaratmaq və pedaqoji kollektivi motivasiya etmək bacarığı məktəbin ümumi nəticələrinə, müəllim və şagird nailiyyətlərinə həlledici təsir göstərir. Məhz buna görə də Elm və Təhsil Nazirliyi son illərdə bu istiqamətdə ciddi islahatlara başlayaraq, direktorların təyin olunması qaydalarını tamamilə yeniləyib. Yeni mexanizm artıq test mərhələsini istisna etməklə, yalnız qeydiyyat və müsahibə əsasında səriştəyə əsaslanan seçim modelini tətbiq edir.
Yeni sistemin əsas məqsədi idarəetmədə şəffaflığı artırmaq, məktəblərin rəhbərliyinə yalnız idarəçilik və liderlik qabiliyyəti olan şəxsləri gətirmək, eyni zamanda uzunmüddətli vakansiya problemini aradan qaldırmaqdır. Hazırda ölkədə 600-ə yaxın məktəbdə direktor vəzifəsinin boş qalması göstərir ki, əvvəlki çoxmərhələli, testə əsaslanan model praktik baxımdan səmərəli deyildi. Direktor seçiminin uzun çəkməsi, texniki prosedurların çoxluğu və müəyyən hallarda namizədlərin test mərhələsində sırf nəzəri suallarla kənarda qalması nəticəsində məktəblər rəhbərsiz qalırdı. Yeni qaydalar bu baryeri aradan qaldırır və real idarəetmə bacarığına, etik davranışa və sosial liderliyə malik namizədlərə üstünlük verir".
O əlavə etdi ki, “Təhsil haqqında” Qanunun 27-ci maddəsinə əsasən, ümumi təhsil müəssisəsinin rəhbəri məktəbin fəaliyyətinə, tədris prosesinin keyfiyyətinə və idarəetmə resurslarının səmərəli istifadəsinə görə məsuliyyət daşıyır:
"Bu baxımdan, rəhbərin seçimi sırf bilik yox, həm də idarəetmə bacarığı əsasında aparılmalıdır. Yeni qaydalarda qeyd olunur ki, direktor vəzifəsinə namizədlər əvvəlcə elektron qeydiyyatdan keçir, daha sonra müsahibə mərhələsinə dəvət olunur. Bu proses rəqəmsal sistem üzərindən aparılır, bu isə şəffaflığı və nəticələrin obyektivliyini təmin edir. Müsahibə mərhələsində namizədin liderlik qabiliyyəti, qərarvermə bacarığı, pedaqoji və sosial mühitə münasibəti, problem həlli, emosional sabitlik, innovasiyaya açıq olması kimi səriştələr qiymətləndirilir".
