Tələbələrə və məktəblilərə güzəştli kartlar verilsin !
Təklif var ki, əgər brutto müqaviləyə keçilirsə, yanvarın 1-dən tələbələrə günlük, aylıq və illik bilet paketləri təklif edilməlidir.
AzTehsil.com xəbər verir ki, təkliflə bağlı danışan Sosial-strateji Tədqiqatlar və Analitik Araşdırmalar İctimai Birliyinin sədri İlqar Hüseynlinin sözlərinə görə, dünya praktikasında bu, bütün universitetlərdə var:"Tələbələrə illik, aylıq güzəştli kartlar verilir. Bu güzəştli kartlar vasitəsilə tələbələr ictimai nəqliyyatdan davamlı olaraq istifadə edirlər. Məsələn, Türkiyə universitetlərində bir qayda var. Onlar tələbələrə güzəştli minik kartları verirlər. İstər avtobuslara miniş, istər də metroya bir dəfə giriş yarı bilet qiyməti ilə hesablanır. Yox, əgər onunla bərabər eyni anda ikinci nəfəri də keçirirsə, ikinci dəfə təmasda artıq tam biletin qiyməti ödənir. Yəni hər girişdə bir dəfə güzəşt olmaq şərti ilə güzəştli kartlar verilir. Bu kartlar vasitəsilə ictimai nəqliyyatda tələbələr tamamilə yararlana bilirlər".
O vurğuladı ki, Avropa ölkələrində də bu sistem qurulub.
"Azərbaycanda isə bununla bağlı biz dəfələrlə təkliflər vermişik ki, tələbələrə, ailəsində iki və daha artıq məktəbli olan ailələrin hər birinə iki-üç ədəd belə güzəştli kartlar verilsin. SSRİ dövründə biz universitetdə oxuyarkən 40 manat təqaüd alırdıq, 2 manat 50 qəpiyi isə hər ay bizim daimi ictimai nəqliyyat üçün istifadə etdiyimiz kartlara tutulurdu. Yerdə qalan 37 manat 50 qəpik bizə tam ödəniş olunurdu. Demək məqsədim odur ki, bu praktika var. Sadəcə olaraq onu sistemləşdirib tətbiq etmək lazımdır", - deyə nəqliyyat eksperti fikrini yekunlaşdırıb.
