Şəkidə Milli Biznesin İnkişafı Forumunun xüsusi sessiyası keçirilib
Şəkidə Milli Biznesin İnkişafı Forumunun xüsusi sessiyası keçirilib.
AzTehsil.com xəbər verir ki, oktyabr ayının 10-da Şəkidə Milli Biznesin İnkişafı Forumunun xüsusi sessiyası keçirilib.
“Marxal Resort və Spa” otelində keçirilən tədbir Şəki Şəhər İcra Hakimiyyətinin dəstəyi, “Caspian Energy Club” və Azərbaycan Milli Biznes Assosiasiyasının birgə təşkilatçılığı ilə baş tutub.
Forum çərçivəsində iştirakçılar yerli biznesin inkişaf perspektivləri, iqtisadiyyatın müxtəlif sahələrində əməkdaşlıq imkanları və regionda sahibkarlığın dəstəklənməsi məsələlərini müzakirə ediblər. Çıxışlar zamanı Şəki rayonunun əsas təsərrüfat istiqamətləri olan taxılçılıq, maldarlıq, tütünçülük, üzümçülük, ipəkçilik və baramaçılıq sahələrində görülən işlər, əldə olunan nəticələr və mövcud potensial barədə ətraflı məlumat verilib. Bildirilib ki, bu sahələrin inkişafı regionun sosial-iqtisadi həyatında vacib rol oynayır və kənd təsərrüfatı istehsalının genişlənməsinə mühüm töhfə verir.
Forumun davamında interaktiv dialoq formatında təşkil olunmuş müzakirələrdə sahibkarların müxtəlif mövzularda səsləndirdikləri suallar ətraflı cavablandırılıb. Sessiyanın sonunda Şəki Şəhər İcra Hakimiyyətinin başçısı Elxan Usubova “Caspian Energy Club”ın fəxri üzvlük sertifikatı təqdim olunub.
Günün ikinci yarısında isə “Grand CEO Tour” çərçivəsində iştirakçılar Şəkidə fəaliyyət göstərən bu şəhərin tarixi mətbəx ənənələrini qoruyan "Əliəhməd Şirniyyat Evi"ni və beynəlxalq bazarlarda öz keyfiyyətli məhsulları ilə tanınan "Az Abrau - Şəki şərab zavodu”nu ziyarət ediblər. Onlar yerli istehsal prosesləri ilə tanış olaraq, müəssisələrin texnoloji imkanlarını, biznes strategiyalarını və inkişaf planlarını yerində öyrəniblər.
