Azərbaycan məktəblisi Çində mükafat QAZANIB
Çində orta məktəb şagirdləri üçün 18-ci beynəlxalq “Çin dili körpüsü” müsabiqəsinin final mərhələsi keçirilib. Finalda Azərbaycan Dillər Universitetinin nəzdində fəaliyyət göstərən Konfutsi İnstitutunun tələbəsi, ölkəmizdə orta məktəb şagirdləri arasında keçirilən “Çin dili körpüsü” müsabiqəsinin qalibi Kamil Bünyatov da iştirak edib.
AzTehsil.com xəbər verir ki, İnstitutdan bildirilib ki, “Pekin və Tyantszin mədəni irsi ilə səyahət” devizi altında keçirilən müsabiqənin iştirakçıları üçün geniş mədəni-maarifləndirici proqram təşkil olunub. Onlar Pekində Beynəlxalq Dil Mübadiləsi və Əməkdaşlıq Mərkəzində, Böyük Çin Səddində, Ququn imperator sarayında olublar. Həmçinin Olimpiya Muzeyində tanınmış Çin cüdoçusu və Olimpiya çempionu Tun Ven ilə görüşüblər. Kamil Bünyatov Tyantszin şəhərində müsabiqənin final mərhələsində iştirak edib və münsiflər heyətinin qərarı ilə “Əla nailiyyətlərə görə” mükafatına və Çində təhsil almaq üçün dövlət təqaüdünə layiq görülüb. Müsabiqədə onun musiqi ifası xüsusi diqqət çəkib. Milli Çin fleytası olan “hulusi” alətində virtuoz ifası ilə o, iştirakçıların rəğbətini qazanıb və Tyantszin Universitetində qarşılanma qala-konsertinə dəvət edilib.
Müsabiqə iştirakçıları, həmçinin Döyüş Sənəti Akademiyasında nağara, kunq-fu ustad dərslərinə qatılıb və ailə mübadiləsi proqramı çərçivəsində Tyantszin orta məktəbləri şagirdlərinə baş çəkiblər. Müsabiqə iştirakçıları Tyantszin İncəsənət Muzeyində, Lenovo Sənaye Parkında, Milli Dəniz Muzeyində və Tyantszin Qeyri-Maddi Mədəni İrs Sərgisində də olublar.
ADU-nun nəzdində Konfutsi İnstitutunun direktoru Rafiq Abbasovun qeyd etdiyi kimi, tarixən İpək Yolu ilə bağlı olan Azərbaycan və Çin arasında humanitar əməkdaşlıq son illər yeni inkişaf mərhələsi alıb. Bu, ilk növbədə, Azərbaycanın Çinin “Bir kəmər, bir yol” təşəbbüsündə fəal iştirakı və İpək Yolu üzərində yerləşən ölkələr arasında mədəniyyətlərarası dialoqun təşviqi ilə bağlıdır. O, həmçinin iki ölkə arasında tələbə mübadiləsi, hər iki ölkənin təhsil müəssisələrində Azərbaycan və Çin dillərinin tədrisi sahəsində əməkdaşlığın genişləndirilməsinin vacibliyini xüsusi vurğulayıb.
Müsabiqəyə 106 ölkədən ümumilikdə 195 xarici tələbə qatılıb. Beynəlxalq-mədəni əlaqələri genişləndirmək məqsədi daşıyan müsabiqədə münsiflər heyəti həm Çin dilini bilmə səviyyəsini, həm də Çin mədəni xüsusiyyətlərinə dair bilikləri qiymətləndirib.
