Dillər Universitetinin Konfutsi İnstitutu....- ƏTRAFLI

Azərbaycan Dillər Universitetinin (ADU) Konfutsi İnstitutu 2025-ci ildə “Ən yaxşı Konfutsi İnstitutu” 5-ci Ümumdünya Qısa Video Müsabiqəsində növbəti dəfə yüksək nəticələr əldə edib.

AzTehsil.com xəbər verir ki, ADU-dan  bildirilib ki, müsabiqəyə 84 ölkədən, 143 Konfutsi İnstitutundan ümumilikdə 616 layihə təqdim olunub. Bir neçə seçim mərhələsindən sonra münsiflər heyəti tərəfindən üç xüsusi mükafat seçilib: 15 layihə birinci mükafat, 30 layihə ikinci mükafat, 100 layihə üçüncü mükafat, 37 Konfutsi İnstitutu “Görkəmli təşkilat” mükafatı alıb və 15 müəllif “Konfutsi İnstitutunun ustadı” adına layiq görülüb.

Müsabiqəyə ADU-nun Konfutsi İnstitutunun müəllimləri Lu Linin “İpək Yolunda dil körpüləri” və “Mənim Çin üslubunda səyahətim”, Van Cicon “Külək Qərbə əsir: Bakılı qızın Çin heroqliflər dünyasına səyahəti” əsərlərini təqdim ediblər. Onların əsərləri üçüncü yerlə mükafatlandırılıb. Konfutsi İnstitutu fərdi mükafatlarla yanaşı, “Əla təşkilati koordinasiya və yaradıcı nəticələr” mükafatına da layiq görülüb.

İnstitutun direktoru Rafiq Abbasovun qeyd etdiyi kimi, bu mükafatlar silsiləsi Konfutsi İnstitutunun mədəni kommunikasiya potensialını, müəllim heyətinin və tələbələrinin yaradıcılıq həvəsini nümayiş etdirir və Çin ilə Azərbaycan arasında mədəni, dil və elm-təhsil mübadiləsinin inkişafına verdiyi fəal töhfəni əks etdirir. R.Abbasov Konfutsi İnstitutunun gələcəkdə də Çin dilinin ünsiyyət və tədrisi metodlarının təkmilləşdirilməsi, onların işinin davam etdiriləcəyini bildirib. Qeyd edib ki, azərbaycanlı gənclərin çinli gənclərlə dostluq etməsi, Çin tarixi və mədəniyyəti ilə tanış olması, həmçinin Çin dilini sevməsi onlar üçün yeni imkanlar yaradır.