Məktəbli avtobuslarının abunə qiyməti açıqlanıb

“2School” layihəsi 1 oktyabrdan Bakı şəhərində yerləşən 8 dövlət və 3 özəl məktəbdə pilot formada fəaliyyətə başlayacaq”.

AzTehsil.com xəbər verir ki, bu fikirləri “2School” layihəsinin həmtəsisçisi Orxan Abbasov “Azərbaycan müəllimi”nə açıqlamasında deyib.

Onun sözlərinə görə, bu, Elm və Təhsil Nazirliyinin dəstəyi ilə həyata keçirilən pilot layihədir: “Artıq 1200-dən çox aktiv istifadəçimiz, yəni şagirdimiz var. Gözlədiyimizdən qat-qat çox maraqla qarşılaşdıq”.

Orxan Abbasov əlavə edib ki, 2026-cı ilin sentyabrından layihə daha geniş şəkildə digər məktəblərdə də tətbiq olunacaq:

“Biz ilkin mərhələdə 300-400 nəfər gözləyirdik, amma tələb çox yüksək oldu. Bu, artıq Azərbaycanda uğurla tətbiq edilən startap nümunələrindən birinə çevrilib”.

Layihə çərçivəsində şagirdlərin məktəbə təhlükəsiz və nizamlı daşınması üçün xüsusi mobil tətbiq hazırlanıb: “Valideynlər tətbiqi yükləyərək övladlarını qeydiyyatdan keçirirlər, məktəb və qrafik seçirlər. Avtobuslarda peşəkar dayələr olur. Onlar uşaqlara nəzarət edir və valideynlərlə daimi əlaqədə olurlar”. 

O əlavə edib ki, qiymətlər 100 manatdan başlayır və şəhid ailələri ilə qazi övladları üçün xüsusi güzəştlər nəzərdə tutulub. Avtobus xidmətindən istifadə üçün aylıq abunə haqqı məsafəyə görə dəyişəcək.

Abbasov həmçinin qeyd edib ki, altıgünlük tədris sistemi ilə işləyən məktəblər üçün də uyğunlaşdırılmış həllər təklif olunur:

“Bu, tıxac problemini həll etməyə yönəlmiş və birbaşa olaraq nazirliyin təşəbbüsü ilə irəli sürülmüş addımdır”.

Açıqlamada həmçinin valideynləri maraqlandıran güzəştlər məsələsinə də toxunulub. Qeyd olunub ki, ailədə bir neçə uşaq layihədə iştirak edirsə, ikinci uşağa güzəşt tətbiq edilir.