Agentlik bir sıra peşə ixtisasları üzrə imtahan keçirib
Avqustun 29-da Təhsildə Keyfiyyət Təminatı Agentliyi (TKTA) “Bərbər-vizajist-manikürçü”, “Bərbər”, “Dərzi”, “Qənnadçı, şirniyyatçı” peşə ixtisasları üzrə Qaçqınların və Məcburi Köçkünlərin İşləri üzrə Dövlət Komitəsinin maliyyə dəstəyi ilə növbəti nəzəri imtahan keçirib. İmtahanda 26 nəfər iştirak edib.
AzTehsil.com xəbər verir ki, bu barədə Agentlikdən məlumat verilib.
TKTA tərəfindən qeyri-formal və informal yollarla əldə edilmiş bilik, bacarıq, səriştə və təcrübənin qiymətləndirilməsi və tanınması prosesi iki mərhələdən ibarətdir. İlk mərhələdə nəzəri imtahanı uğurla keçən müraciətçilər ikinci mərhələdə praktiki bacarıqların qiymətləndirilməsi imtahanında iştirak etmək hüququ qazanırlar. Praktiki imtahanda uğur qazanan namizədlər müvafiq peşə ixtisasları üzrə sənəd əldə edirlər.
Sözügedən fəaliyyətin əsas məqsədi vətəndaşların əmək bazarında özünüməşğulluq imkanlarının artırılmasına və bu sahədə həyata keçirilən dövlət siyasətinə dəstək göstərməkdən ibarətdir.
Agentlik imtahanlarda iştirak etmək istəyən şəxslərin nəzərinə çatdırır ki, hazırda peşə ixtisasları üzrə qeydiyyat davam edir. Vətəndaşlar həmin imtahanlar üzrə qeydiyyatdan keçə bilərlər.
Məlumat üçün bildiririk ki, Agentlik tərəfindən təqdim edilən müvafiq sənədlər Nazirlər Kabinetinin 2020-ci il 5 avqust tarixli 279 nömrəli Qərarına əsasən ilk peşə təhsili səviyyəsində təhsil haqqında sənədə bərabər tutulur, sahibinə peşə təhsili pilləsinin növbəti səviyyəsində təhsilini davam etdirmək və eləcə də peşə ixtisası üzrə əmək fəaliyyətinə başlamaq hüququ verir.
