Bu abituriyentlərə ikinci şans veriləcək - RƏSMİ
İxtisas seçimi prosesi başa çatsa da, minlərlə abituriyent arzuladığı ali məktəbə daxil ola bilməyib. Dövlət İmtahan Mərkəzinin açıqlamasına görə, bu il 25 mindən çox abituriyent ali təhsil müəssisələrinə qəbul şansı qazana bilməyib. Lakin onlar üçün yeni mərhələdə ikinci fürsət yaradılacaq.
AzTehsil.com xəbər verir ki, Dövlət İmtahan Mərkəzindən verilən məlumata görə, növbəti həftə ərzində dərc olunacaq “Abituriyent” jurnalının 7-ci sayında müsabiqədə iştirak edən, lakin ali təhsil müəssisələrinə qəbul olmayan abituriyentlərin imtahan ballarının paylanması haqqında geniş məlumat təqdim olunacaq.
Bildiirlib ki, jurnalda ali təhsil müəssisələrinin boş qalan (vakant) plan yerlərinin siyahısı da veriləcək.
“Həmin yerlərə ixtisas seçimi avqustun 28-dən sentyabrın 2-dək internet vasitəsilə aparılacaq. Abituriyentlər elektron ərizədə ali təhsil müəssisələrinin boş qalan plan yerlərinin ixtisasları ilə yanaşı orta ixtisas təhsili müəssisələrinin (kolleclərin) ixtisaslarının da kodlarını göstərə bilərlər. Orta ixtisas təhsili müəssisələrinin qəbul aparılan ixtisasları növbəti həftənin əvvəllərində “Abituriyent” jurnalının 5-ci sayında dərc olunacaq”,- məlumatda qeyd olunub.
