Sertifikasiya imtahanında çətin FƏNN !?
AzTehsil.com xəbər verir ki, bu il biologiya, kimya, fizika, coğrafiya və informatika fənləri üzrə sertifikasiya imtahanları keçiriləcək. Həmçinin ötən il birinci mərhələdən uğurla keçə bilməyən müəllimlərə yenidən iştirak imkanı veriləcək.
Maraqlıdır, bu il ilk dəfə keçiriləcək imtahanlar arasında hansı fənndə zəif nəticələr gözlənilir?
Mövzu ilə bağlı açıqlama verən ixtisas seçimi və karyera üzrə mütəxəssis, təhsil eksperti Ramin Nurəliyev bildirib ki, ötənilki imtahanda müsbət nəticə əldə edənlər fəaliyyətlərini davam etdirdilər, kəsilənlərin isə əmək müqavilələrinə xitam verildi:“Nazirlik bu məsələyə kifayət qədər humanist yanaşır. Sertifikasiya imtahanının ilk cəhdində uğur qazanmayaraq kəsilən müəllimlərə 1 il müddətində təkrar hazırlaşmaq imkanı verilir. Bu zaman ərzində çatışmazlıqlarını aradan qaldıraraq növbəti imtahanda iştirak edib, nəticələrini yaxşılaşdıraraq iş fəaliyyətlərini davam etdirmək şansı əldə edirlər. Lakin təəssüf ki, əvvəlki illərin təcrübəsi göstərdi ki, bəzi müəllimlər bu imkana səhlənkar yanaşır və nəticədə yenə də uğursuz olu
Ekspert hesab edir ki, bu il keçiriləcək sertifikasiya imtahanlarında ən çətin fənn informatika olacaq:
“İnformatika fənnində müəllimlərin daha çox çətinlik çəkdiyi müşahidə olunur. Bu səbəbdən müsabiqə şərtlərini yerinə yetirmək, digər fənnlərlə müqayisədə burada daha çətin ola bilər. Fizika, kimya, biologiya və coğrafiya fənlərində uğursuzluq yaşayanların sayı, düşünürəm ki, informatika ilə müqayisədə az olacaq. Əlbəttə, bu mənim subyektiv fikrimdir. Ola bilsin, kimya fənni də nisbətən çətinlik yaratsın, amma əsas narahatlıq informatika ilə bağlıdır".
O əlavə edib ki, nəticələrə sualların hazırlanması da ciddi təsir göstərir:
“Əgər imtahan sualları asan və uyğun tərtib olunarsa, uğurlu nəticələrin sayı da artacaq. Lakin çətinlik səviyyəsi yüksək olarsa, bu, müəllimlərin performansına təsir edə bilər".
R.Nurəliyev müəllimlərin imtahanlara ciddi şəkildə hazırlaşmalı olduğunu vurğulayıb:
“Əvvəlki illərin sertifikasiya imtahanlarında bəzi müəllimlərin asan suallarda belə çətinlik çəkdiyinin şahidi olduq. Bu imtahanın Azərbaycan təhsil sistemi üçün əhəmiyyəti böyükdür. Əslində bu proses nəticəsində biz övladlarımıza dərs deyən müəllimlərin səviyyəsini daha yaxından tanımağa başladıq. Sertifikasiya beynəlxalq təcrübədə də tətbiq olunan bir modeldir. Əgər təhsilimizdə keyfiyyətli dərs istəyiriksə, sertifikasiyanı dəstəkləməliyik. Çünki bu imtahan müəllimlərin real vəziyyətini ortaya qoyur”.
