Şəki-Zaqatala bölgəsində IX siniflər üzrə monitorinq keçirilib
Noyabrın 23-də Şəki-Zaqatala Regional Təhsil İdarəsinin tabeliyindəki ümumi təhsil məktəblərinin IX sinifləri üzrə monitorinq təşkil edilib. Regional İdarə tərəfindən keçirilən monitorinqin əsas məqsədi şagirdlərdə bilik və bacarıqların formalaşma səviyyəsini müəyyən etmək, buraxılış imtahanlarının nəticələrinə mənfi təsir edən səbəbləri aşkarlamaq və tədrisin keyfiyyətinin daha da artırılmasına nail olmaqdan ibarətdir.
Regional Təhsil İdarəsindən AZƏRTAC-ın bölgə müxbirinə bildirilib ki, monitorinq Azərbaycan dili, riyaziyyat və xarici dil fənləri üzrə keçirilib. Təhsilalanlara bu fənlərinin hər biri üzrə 30 sual təqdim olunub. Sualların cavablandırılması üçün 180 dəqiqə vaxt verilib.
Monitorinqlər bitdikdən sonra nəticələr bal və məzmun təhlili formasında təhsil müəssisələrinə təqdim olunacaq.
