"Telefon zənglərində azalma var" Murad Camalzadə

Son zamanlar etdiyim paylaşımlarda hər dəfə təkrar olunan fikir belədir: "Guya İnsan Resursları Mərkəzinə etdiyimiz müraciətlərə baxılır ki?!".

Bu tip iradlar hər dəfə bildirildiyi üçün İnsan Resursları Mərkəzinin vətəndaş müraciəti kanallarındakı (e-mail, facebook, whatsapp business) mövcud cavablandırma vəziyyətinə bir daha nəzər saldım. Mənə təkrar məlum oldu ki, adıçəkilən kanallar üzrə daxil olan müraciətlər elə həmin astronomik günün sonunadək (nadir hallarda ən geci qanunvericilikdə nəzərdə tutulmuş müddət ərzində) cavablandırılır. Hətta qeyri-iş günlərində, həmçinin sənəd qəbulları dövründə gecə saatlarında belə N sayda cavablandırma hallarına rast gəldim.

Bundan əlavə, bir gün ərzində telefon zənglərinin cavablandırılması tezliyini də müşahidə etdim. Ötən illərin anoloji dövrləri ilə müqayisədə telefon zənglərinin sayında ciddi azalma var. Bu davamlı tendensiyanın səbəbi geridə buraxdığımız zaman ərzində müraciət kanallarının diversifikasiya olunmasıdır. Bir sözlə, telefon zənglərinin də sayında ajiotaj hiss edilmir.

Bu təkrar müşahidələrdən sonra məndə belə bir səmimi sual yarandı: "Bəs müraciəti cavablandırlımayan vətəndaşlar kimlərdir?"

Bir qrup müraciətlər var ki, onlara vətəndaşlarımızın arzu etdiyi məzmunda cavab verilməsi ya mövcud qanunvericiliyin tələblərinə ziddir, ya da ki İnsan Resursları Mərkəzinin səlahiyyətlərini aşır. Müəyyən müraciətlər də var ki, onlar, ümumiyyətlə, İnsan Resursları Mərkəzinin fəaliyyət istiqamətlərinə aid deyil.

Bir vacib məqam da var ki, bizi düşündürən suallara cavab tapmaq üçün müraciətin düzgün formalaşdırılması və aidiyyəti üzrə ünvanlandırılması zəruridir.

Əziz vətəndaşlarımız,

Etiraf edim ki, gəldiyim qənaətə əsasən vətəndaş müraciətləri əvvəlki dövrlərdə olduğu kimi yenə də operativ qaydada cavablandırılır. Sorğulara aidiyyəti formada cavab verilir, bu mümkün olmadıqda isə vətəndaşlarımız müvafiq qaydada maarifləndirilir. Amma şəxsi qənaətimə baxmayaraq, yenə də müraciətlərin cavablandırılmaması ilə əlaqədar fikirlər səsləndirilirsə, deməli, nəzərdən qaçırdığımız bir problem ola bilər.

Düşünürəm ki, İnsan Resursları Mərkəzi hər birimizin təşkilatıdır. Mərkəzlə əlaqədar mümkün nöqsanların aradan qaldırılması hər birimizin marağında olmalıdır. Eyni zamanda anlayıram ki, sözügedən problem barədə müzakirələrin fərdi qaydada aparılması uzun perspektivdə heç bir fayda verməyəcək. Bu niyyətlə də təklif edirəm ki, "müraciətlərə baxılmır" iradları ilə əlaqədar fikirlərimizi ictimai qaydada müzakirə edək.