Elçin Kərimov təltif edib
AzTehsil.com xəbər verir ki, Gəncə-Daşkəsən Regional Təhsil İdarəsinin müdiri Elçin Kərimov Azərbaycan Respublikasının əməkdar bədən tərbiyəsi və idman xadimi Gəncə şəhər 23 nömrəli tam orta məktəbin fiziki tərbiyə müəllimi Elçin Zeynalovu təhsil və İdman sahəsində səmərəli fəaliyyəti və 77 illik yubileyi münasibətilə təbrik edərək təşəkkürnamə ilə təltif edib.
Görüşdə GDRTİ-nin müdiri Elçin Kərimov əməkdar bədən tərbiyəsi və idman xadimi Elçin Zeynalovu 77 illik yubileyi münasibətilə təbrik edərək, ona can sağlığı, gələcək fəaliyyətində uğurlar arzulayıb.
Qeyd edək ki, Elçin Zeynalovun bir çox yetirməsi Dünya, Avropa çempionatlarının, Dünya Kubokunun qalibi və mükafatçılarıdır. Elçin Zeynalovun yetirməsi Toğrul Əsgərov 2012-ci ildə London Olimpiya Oyunlarının qızıl medalını qazanıb, 2016-cı il Rio de-Janeyro Olimpiya Oyunlarında gümüş medala yiyələnib.
Güləşin inkişafındakı xidmətlərinə görə Elçin Zeynalov 1973-cü ildə SSRİ idman ustası, 1989-cu ildə əməkdar məşqçi adlarına layiq görülüb. Azərbaycan Respublikası Prezidentinin 25 dekabr 2008-ci il Sərəncamı ilə “Əməkdar bədən tərbiyəsi və idman xadimi” fəxri adı, 31 avqust 2012-ci il tarixli Sərəncamı ilə "Şöhrət" ordeni, 29 iyun 2015-ci il tarixli Sərəncamı ilə “Azərbaycan Respublikası Prezidentinin fəxri diplomu” və 1 sentyabr 2016-cı il tarixli Sərəncamı ilə "Tərəqqi" medalı ilə təltif olunub. 
