"İmtahanlarla bağlı heç bir güzəşt olmayacaq" -EKSPERT FİKRİ
“2 və 9 mart tarixlərində cari ilin məzunlarının buraxılış imtahanları keçirildi. Buraxılış imtahanı abituriyentlərin attestat almaları, kolleclərə və yüksək peşə məktəblərinə sənədlər vermələri üçün əsasdır”.
AzTehsil.com xəbər verir ki, bu sözləri təhsil üzrə ekspert Rizvan Fikrətoğlu açıqlamasında deyib. Onun sözlərinə görə, buraxılış imtahanı ali məktəblərin birinci mərhələsinin balı kimi hesablanır: “Yəni 300 balı buraxılış, 400 balı isə blok imtahanı nəticəsində toplayırlar.
Ümumilikdə, əvvəlcədən proqnoz etdiyim kimi, indidə vəziyyət elədir. Daha öncə buraxılış imtahanlarının keçən ildən çətin olmayacağını, asan olacağını bildirmişdim. Elə də oldu. Lakin 9 mart buraxılış imtahanlarının 2 marta nisbətən çətin olduğunu səsləndirənlər də var. Bunun əksini iddia edən şagird və müəllimlər də var. Təbii ki, nəticələr çıxmamış konkret bir fikir bildirmək olmaz. Amma ümumi götürsək nəticələrin qənaətbəxş olacağı gözlənilir. Düzdür, kontingent böyük olsa da, buraxılış imtahanlarının zonalar üzrə yox, bir dəfə keçirilməsinin tərəfdarıyam. Ondan sonra "hansı zonanın çətin və ya asan olması" fikirlərini eşitmiş olmarıq”.
