1 nəzarətçi və 3 şagird imtahandan kənarlaşdırılıb
DİM: 3 şagird, 1 nəzarətçi imtahandan kənarlaşdırılıb
İlkin məlumatlara əsasən, DİM-in tam (11 illik) orta təhsil səviyyəsi üzrə keçirdiyi buraxılış imtahanında 3 nəfərdə mobil telefon aşkarlandığı üçün imtahandan xaric edilib.
AzTehsil.com xəbər verir ki, bu haqda DİM məlumat yayıb. 1 nəzarətçi isə iştirakçılara kömək etməyə cəhd etdiyi üçün imtahandan kənarlaşdırılıb.
Qeyd olunan hallarla bağlı araşdırma aparılır.
Qeyd edək ki, imtahanda 58732 şagirdin iştirakı nəzərdə tutulurdu. İmtahan keçirilən şəhər və rayonlarda ümumilikdə 255 imtahan binası, 4430 imtahan zalı ayrılıb. İmtahanların idarə olunmasına 255 ümumi imtahan rəhbəri, 721 imtahan rəhbəri, 5523 nəzarətçi, 773 buraxılışı rejimi əməkdaşı (mühafizə), 255 bina nümayəndəsi ayrılıb.
İmtahanda 70 nəfər sağlamlıq imkanları məhdud (gözdən əlil, serebral iflic, eşitmə əngəlli və digər) abituriyent də iştirak edib. Bu abituriyentlərin rahat şəkildə imtahan verməsi üçün imtahan binalarında xüsusi zallar ayrılıb, orqanizmin funksiyalarının 81-100 faiz pozulmasına görə gözdən əlilliyi müəyyən edilmiş şəxslərə isə fərdi nəzarətçilər təyin edilib. Hərəkət məhdudiyyətli şagirdlərin bina və zala daxil olması və hərəkəti üçün də şərait yaradılıb.
