Goranboyda qaçırılan məktəbli ilə bağlı AÇIQLAMA
Goranboy rayonunda məktəbli qız itkin düşüb.
AzTehsil.com “Qafqazinfo”- a istinadən xəbər verir ki, 9-cu sinif şagirdi 15 yaşlı Z. B.-nin itkin düşməsi barədə yerli hüquq-mühafizə orqanı əməkdaşları məlumatlandırılıb.
DİN-in Mətbuat xidmətinin Gəncə regional qrupundan bildirilib ki, məsələ ilə bağlı Goranboy Rayon Polis Şöbəsində araşdırma başlanılıb. Araşdırmanın nəticəsi barədə məlumat veriləcək.
Məktəbli qızın evlənmək məqsədilə qaçırıldığı iddia olunur.
***
Gəncə-Daşkəsən Regional Təhsil İdarəsindən APA-ya bildirilib ki, sözügedən şagird 3 dərsdə iştirak etsə də, lakin 4-cü dərsdən məktəbi tərk edib:
“Goranboy şəhər 2 saylı tam orta məktəbin 9-cu sinif şagirdinin qaçırıldığı iddiası ilə bağlı yayılan xəbərlə bağlı bildiririk ki, məktəbin şagirdi martın 12-də ilk 3 dərsdə iştirak edib. 4-cü dərsdən məktəbi tərk edərək sonrakı dərslərdə iştirak etməyib”.
Bildirilib ki, aidiyyəti qurumlarla birlikdə şagirdin valideyni ilə əlaqə saxlanılıb.
Məsələ ilə bağlı hazırda hüquq-mühafizə orqanları tərəfindən araşdırma aparılır.
