Cəlilabadda müəllim qız şagirdə sataşdığı üçün döyülüb? — Nazirlikdən AÇIQLAMA

Cəlilabad rayonunda döyülmə hadisəsi baş verib. Rayonun Uzuntəpə kənd 3 saylı orta məktəbin müəllimi Aqıl Əzizov kənd sakinləri tərəfindən döyülüb.

"Ölkə.Az" xəbər verir ki, onun döyülmə anı mobil telefonla lentə alınıb və kənd sakinləri arasında yayılıb.

Daxili İşlər Nazirliyi xidmətinin rəis müavini, polis polkovniki Orxan Mansurzadə "Ölkə.Az" a hadisə ilə bağlı məlumat verib.

Onun sözlərinə görə, Cəlilabad rayonu Uzuntəpə kənd 3 saylı tam orta məktəbinin ibtidai sinif müəllimi Aqil Əzizov mayın 17-də Rayon Polis Şöbəsinə ərizə ilə müraciət edərək mayın 16-da saat 22 radələrində bir qrup həmkəndlisi tərəfindən döyüldüyünü bildirib. Müraciət əsasında polis tərəfindən müvafiq izahatlar alınıb, hadisə yerinə baxış keçirilib, məhkəmə tibbi ekspertizası təyin edilərək müvafiq rəy əldə edilib və digər təxirəsalınmaz hərəkətlər icra olunub. Ekspertizanın rəyində A.Əzizovun döyülmə nəticəsində sağlamlığına yüngül zərər vurulduğu müəyyən edilib.

Müəllimin şagirdə sataşdığı üçün döyülməsi barədə yayılan xəbərlərə də münasibət bildirən O. Mansurzadə qeyd edib ki, hadisə ilə bağlı hər iki tərəfin izahatları alınıb. Lakin araşdırma zamanı həmin fakt təsdiqini tapmayıb. Hadisəni törədən şəxslər də yayılmış müəyyən şayiələr əsasında, anlaşılmazlıq zəminində və emosional halda müəllimi döydüklərini peşmançılıq hissi ilə etiraf ediblər və tərəflər arasında barışıq da əldə olunub.

Faktla bağlı Cəlilabad Rayon Polis Şöbəsinin istintaq bölməsində Cinayət Məcəlləsinin 128-ci (qəsdən sağlamlığa yüngül zərər vurma) maddəsi ilə cinayət işi başlanıb, istintaq hərəkətləri davam etdirilir.