Xəbərlər
29 iyul 2018
3 931
"Sual konkretdir və konkret də cavabı var..Kamran Əsədov bunu bilmirsə, öz günahıdır”
Nadir İsrafilov: "Mən bunu ciddi səhv və ya mübahisə obyekti kimi qiymətləndirməzdim”
Təhsil üzrə tanınmış ekspert Nadir İsrafilov son günlər qəbul imtahanında baş verən "səhv sual” qalmaqalı ilə bağlı məsələyə aydınlıq gətirib:
Mən bunu ciddi səhv və ya mübahisə obyekti kimi qiymətləndirməzdim. Hakimliyə namizəd və hakim ayrı-ayrı anlayışlar olsa da, namizədin məqsəd və məramı hakim olmaqdır, Bu mənada həmin sualların cavablandırIlmasında heç bir təzad və ya ziddiyyət görmürəm.
Bu sözləri ekspert Kamran Əsədovun II ixtisas qrupu üzrə D variantı sual kitabçasında (eyni test tapşırığı B variantında da var) 91 saylı test tapşırığının ümumiyyətlə səhv olması iddiasına cavab verən təhsil eksperti Nadir İsrafilov deyib. O bildirib ki, DİM tərəfindən səhv sualların salınması əvvəllər də rast gəlinən hadisədir:
"Ümumiyyətlə götürdükdə, DİM-in keçirdiyi ayrı-ayrı ixtisas qrupları üzrə ali məktəblərə qəbul imtahanında düşən səhv test tapşırıqlarının olması barədə zaman-zaman məlumatlar yayılması birinci hal deyil. İstər-istəməz onunla da razılaşmalıyıq ki, bu kimi halların baş verməsi sadalamağa ehtiyacı olmayan müxtəlif səbəblərdən irəli gəlib, gəlir və gələcəkdə də gözləniləcəyi istisna olunmur və bunun süngü-qalxanla qarşılanmasının da o qədər də tərəfdarı deyiləm. Hər şeydən əvvəl ona görə ki, DİM üzərinə son dərəcə böyük yük götürüb və daşıdığı məsuliyyət təkcə insan amili ilə deyil, texniki səbəb və bir çox digər faktorlarla da əlaqədardır. Əlbəttə, bu kimi arzuolunmaz hallar baş verərkən, yəni səhv tərtib edilən sualların etiraf edilməsi və cavabların məhz abituriyentlərin xeyrinə hesablanması birmənalıdır. Ədalət naminə deməliyik ki, dəfələrlə DİM tərəfindən belə addımların atılmasının da bilavasitə şahidi olmuşuq”.
Məsələyə münasibət bildirən digər təhsil eksperti Elçin Əfəndi isə sözügedən sualın yanlış olmadığını bildirirək, Kamran Əsədovu yanlış məlumat yaymaqda ittiham edib:
"Bu sualda DİM əsaslı olaraq səhv olmadığını bildirir. Çünki burada doğru cavab var. Hakimlər elmi fəaliyyətlə məşğul ola bilər, Milli Məclis üzvlüyünə namizədlər də həmçinin. Eləcə də din xadimləri ola bilməzlər. Orada soruşulan sual konkretdir və konkret də cavabı var. Kamran Əsədov bunu bilmirsə, öz günahıdır”.
Qeyd edək ki, Kamran Əsədov DİM-in keçirdiyi II və III ixtisas qrupu üzrə ali məktəblərə qəbul imtahanında düşən səhv test tapşırıqlarının olması barədə məlumat yaymışdı. O bildirmişdi ki, səhv tərtib edilən bu sualların cavabları abituriyentlərin xeyrinə hesablanmalıdır.
Bundan sonra isə DİM mətbuata açıqlama verərək, sualların düzgün olduğunu və abituriyentlərin xeyirinə hesablanmayacağını bildirib.(axar.az)
