Olimpiadaçıların qış məktəbinə iyirmi şagird qatılıb
Təhsil Nazirliyinin tabeliyindəki fizika, riyaziyyat və informatika təmayüllü liseyin nəzdində yaradılmış Beynəlxalq Olimpiadalara Hazırlıq Mərkəzinin informatika fənni üzrə olimpiadaçı şagirdləri üçün "Azercell”in Barama İnnovasiya və Sahibkarlıq Mərkəzində qış məktəbi təşkil edilib.
Aztəhsil.com xəbər verir ki, nazirlikdən bildiriblər ki, qış məktəbinə paytaxt və bölgələrdən iyirmi şagird cəlb olunub. Qış olimpiada məktəbi zamanı əsas fəaliyyət beynəlxalq olimpiadalara hazırlıq prosesini daha da intensivləşdirməyə, tədris ilinin əvvəlindən keçirilən mövzuların təkrarına və yeni olimpiada məsələlərinin həllinə yönəlib.
Məşğələlər iki yaş qrupu üzrə təşkil olunub. Yuxarı yaş qrupu 10-11-ci sinifləri, aşağı yaş qrupu 8-9-cu sinifləri əhatə edib. Qış məktəbində təlimçilər beynəlxalq olimpiadaların iştirakçıları və qalibləri olmuş gənc mütəxəssislər arasından seçilib.
İnformatika fənni üzrə qış məktəbinin əsas məqsədi şagirdlərin olimpiadalara hazırlıq prosesinin stimullaşdırılması, onların elmi-yaradıcı təşəbbüslərinin artırılması, elmi potensialının nümayiş etdirilməsi üçün şəraitin yaradılmasıdır.
