Ümumi təhsil müəssisələrinin direktorları ilə görüş keçirilib
Elm və Təhsil Nazirliyinin Uşaqların Müdafiəsi İdarəsinin fəaliyyət göstərdiyi, BŞTİ-nin tabeliyində olan ümumi təhsil müəssisələrinin direktorları ilə görüş keçirilib.
AzTehsil.com xəbər verir ki, görüşdə Elm və Təhsil Nazirliyinin Uşaqların Müdafiəsi İdarəsinin rəis müavini Günel Səfərova, Ümumi Təhsil Müəssisələrində Təhsilalanların Hüquqlarının Müdafiəsi İşinin Təşkili Şöbəsinin rəhbəri Gündüz Tapdıqov, şöbənin əməkdaşları, məktəb direktorları və direktor müavinləri iştirak ediblər.
Günel Səfərova görüş iştirakçılarını salamlayaraq Uşaqların Müdafiəsi İdarəsinin fəaliyyəti barədə geniş məlumat verib.
Eyni zamanda məktəblərdə təhlükəsiz mühitin təkmilləşdirilməsinin, şagirdlərin hərtərəfli inkişafının təmin edilməsinin, özünütərbiyə və özünüinkişaf bacarıqlarının formalaşdırılmasının, məktəblərdə konfliktlərin həlli ilə bağlı xüsusi müdaxilənin, psixoloji diaqnostika və dəstək xidmətinin gücləndirilməsinin önəmindən danışıb.
Görüş çərçivəsində mövcud problemlər və onların həlli yolları müzakirə olunub, müvafiq məsələlər ətrafında qarşılıqlı fikir mübadiləsi aparılıb. Daha sonra təhsil müəssisələrinin rəhbərlərinin sualları cavablandırılıb, təkliflər dinlənilib.
